Silot sa pagluib

Nahimong suki na ni Rommel ang Sanciangko’s Wildflower sukad kini buksi ubos sa bag-ong management mga duha ka semana ang milabay. Sagad anha siya magpalabay sa oras human sa iyang trabaho matag hapon tungod sa nindot kaayo niini nga sounds.

Daw sa giganoy siya niadto sa usa ka bato-balani pagsulod sa video karaoke section sa Sanciangko’s Wildflower human siya makadungog sa orihinal g’yod nga kantang Wildflower sa Skylark.

Gikan niadto, kanunay na siya nga mag-anhaan. Halos kaila na gud ni Romel ang panagway sa ubang customers nga maayo usab kaayong manganta. Apan wala gayod usab magpalupig si Rommel sa kinantahay, ilabi na nga taas siya’g tingog.

Nakabantay si Rommel nga mga tulo na ka higayon nga sa matag kanta niya, dunay usa ka babaye sa pikas lamesa nga pilit kaayo’g tinutokan kaniya. Daw sa nagdala og “come here” ang tinan-awan, apan wala lang niya hatagi og bug-at nga pagtagad.

Apan karong hapona, gawas nga nakita ni Rommel nga mitutok na usab kaniya ang babaye samtang siya nagkanta sa My Love Will See You Through diin sundog kaayo niya ang tingog ni Marco Sison, mipakpak na g’yod ug mipahiyom kaniya ang babaye.

Walay kauban ang maong babaye. Disinte ang panapot niini ug gibana-bana niya nga wala pa kini’y 30 ang pangedaron.

Mitungab og gamay’ng beer si Rommel dayon mitindog ug mipaingon sa pansayan. Pagbalik niya paingon sa iyang lamesa, gitimbaya siya sa babaye. “Hi, hanga ko nimo kun mokanta ka.”

Mihunong makadiyot si Rommel ug mipahiyom dungan ang pagpasalamat. “Wala ko’y kauban, basin ganahan ka nga ubanan ko nimo diri sa lamesa. Kuhaa tong imong botelya sa beer,” agda sa babaye ngadto ni Rommel.

Human makuha ang beer sa iyang lamesa, gibalik ni Rommel ang babaye ug didto siya milingkod sa atubangang lingkoranan. Gitunol sa babaye ang iyang palad kang Rommel dungan sa pagtug-an sa iyang ngalan. “Rowena akong ngalan”.

Dali ra nga nagkasuod si Rommel ug si Rowena nga mitug-an nga asawa siya og engineer nga tua magtrabaho sa Saudi Arabia. Mingaw kuno sa balay kay wala man siya’y anak mao nga magkalingaw siya’g kanta-kanta.

Mi-request og kanta si Rowena ngadto sa kawani sa karaokehan. Gusto siya nga kantahon nila ni Rommel ang Bakit Ngayon Ka Lang. Kay usa ra man ang microphone, mibalhin si Rowena paglingkod tupad ni Rommel. (Sumpayan pa)