Idlas ang katumanan sa gugma

Nagkuyog sila paggawas sa buhatan sa UCV Romances. Sa main lobby nasugatan nila si Bernadith Medrano nga mao pay pagsulod.

Nakabantay si Lonia nga hait kaayo’g tinan-awan si Bernadith kaniya. Gilimuokan pa siya niini sa dihang nagsaylo na sila. Si Mike wala magtagad sa maong babaye.

Nakasabot si Lonia kun nganong ingon niadto ang gesture nga gipakita ni Bernadith kaniya. Gawas nga nasina kini tungod sa kalamposan nga iyang kabab-ot isip nobelista, namatikdan usab niya nga dako kaayo kini’g gusto kang Mike. Mosamot tingali ang kalagot ni Bernadith kaniya sa higayon nga masayod kini nga nangulitawo na si Mike kaniya.

Sa usa ka luhong kan-anan sa Rain Tree Mall dad-a si Lonia ni Mike. Siya’y gipapili sa mga pagkaon nga gusto niyang orderon. Aron dili malangan, gipaundayonan niya ang ulitawo.

“Unsa bay okasyon nga nangimbitar ka man?” Nangutana si Lonia samtang nagpaabot sila nga ihatod ang ilang gi-order nga pagkaon. “Birthday nimo ron?”

“Dili, uy,” uban sa pahiyom nga tubag ni Mike. “Dugay pa ang akong birthday. Sa December pa.”

“Kun mao, unsa man diay kining okasyona?”

“Nakadaog ko sa writing contest nga gipasiugdahan sa Komisyon sa Kulturang Sugbuanon. Gusto kong makaambit ka sa akong kadaugan.”

“Mao ba? Congrats!”

“Salamat.”

Nagpig-itay sila sa kamot. -- Sumpayan pa