Sulod sa lawak sa gitsik-inan nga hotel, nagtagbaw si Ondoy sa lamiang pagkaon nga iyang gi-order sa waiter. Usa ka bultong fried chicken, beef steak, tungas kilong litsong baboy ug nag-aray siya sa gagmay'ng beer nga ilimnon. Ingon niini ang naandan niyang buhaton sa matag higayon nga makagulpi siya sa pagpanulis.
Gikaintapang tulisan sa siyudad si Ondoy nga magsakay og motorsiklo. Daghan na siya’g nabiktima. Kun magpagahigahi sa paghatag ang iyang biktimahon nga negosyante, iya kining pusilon ug patyon. Ingon niini kabangis si Ondoy nga idlas pas manatad sa kapulisan sa siyudad.
Kaganihang kaadlawon, nabiktima na usab niya ang usa ka negosyante og karne sa Carbon nga mobiyahe na unta paingon sa Mantalungon aron pagpamalit og mga hayop nga baka. Kay nagmagahi sa paghatag sa kuwarta, gipusil kini niya sa ulo ug nakuha gayud ang kapin sa dosentos mil pesos nga kuwarta. Giapil pa gani niya og pusil patay ang duha ka bodyguard sa maong negosyante.
Tungod kay ulitawo ug taga Mindanao nga way permanenteng adres dinhi sa Sugbu, kanunay nga solo ni Ondoy ang iyang kalipay matag kalampusan sa iyang pagpanulis. Motsik-in dayon siya sa usa ka motel. Bangis gayud nga tulisan ug kriminal si Ondoy, nga gipangita na sa mga tinugyanan sa balaod.
"Ha-ha-ha-ha! Enjoy to the max...! Job well done!" nagtingsi si Ondoy nga mi-on sa TV sulod sa lawak sa hotel. Unya, maoy nasugat sa iyang panan-aw diha sa screen sa TV, ang mapintas nga katalagman sa Metro Manila -- ang gibahaan ug gilunopan nga kabalayan ug kadalanan. Mitingsi ug mikatawa si Ondoy.
"Ha-ha-ha! Bangas ka! Sangay pa gyud nako ang bangis nga bagyo, si Ondoy! Bisan asa, bangis gyud si Ondoy!" ug mibakhak na usab pagkatawa si Ondoy nga paspas miinom sa gi-order nga gagmay'ng beer pilsen. Nahurot na niya ang napulo ka gagmay'ng beer ug gipaabot na usab niya ang laing lima ka gagmay'ng beer pilsen nga gi-order sa waiter.
"Pagkamakaluluoy sa katawhan nga nabiktima sa bangis nga bagyong Ondoy! Pagkaalaot sa mga negosyante nga nabiktima usab sa pagpanulis sa bangis nga si Ondoy ug gipamatay pa gayud! Ha-ha-ha-ha!"
Apan kalit lang nga mihuot ang dugha ni Ondoy. Maglisod siya sa pagginhawa. Mikalit og saka ang dinagaang sa iyang dugo ngadto sa iyang ulo. Milimbag siya nga nahulog sa iyang gilingkuran ug nagligid sa marmol nga salog sa hotel. Miping-it si Ondoy. Nagkanguhal ang iyang tingog. Giatake siya sa hayblad! Dili na niya malihok pa ang iyang lawas. Mikulo na ang iyang dila. Misukdip ang iyang panan-aw. Nagnganga ang iyang baba. Nagtulotulo ang iyang mga laway. Unya, may mihagtos! Milungay ang ulo ni Ondoy.
Wala na mabati pa ni Ondoy ang sagunson nga sangpit ug tuktok sa pultahan sa waiter didto sa gawas nga nagdala na sa gi-order niyang mga beer. Wala na gayud! (Kataposan)