Gula 73
Wala siya motingog.
Dili tingali maghimo’g dautan si Atorni nimo, uy,” nagkanayon si Tasing. “Buotan kaayo nang tawhana.”
Napugos gayod si Rosalinda sa pagpakigkita ni Atty. Gumera sulod sa kuwarto niini. Mapanagan-on siyang misulod. Naabtan niya ang agalon nga nag-trim sa bigote niini atubangan sa salamin. Mihunong kini sa gibuhat pagkamatikod sa iyang pagsulod. Gilingi siya niini. Kalit siyang gikulbaan dihang mitan-aw ang abogado kaniya.
“M-maayong hapon,” may kataha ang iyang pagpangatahoran.
“Maayong hapon sab,” tubag sa agalon. “Lingkod.”
Milingkod siya sa usa ka silya. Si Atty. Gumera milingkod usab sa ngilit sa katre niini.
“Kumosta na ang imong mga ginikanan?” Nangutana ang abogado.
“W-wa pa ko makabalita bahin nila, Atorni,” maoy iyang tubag. “Sukad sa ilang pag-uli sa amo gikang na-ospital si Tatay, wa pa ko makadawat og suwat gikan nila.”
Miyangoyango ang abogado. Unya mitutok kini kaniya. Miduko si Rosalinda kay dili siya makaharong sa tinutokan niini kaniya. -- Sumpayan pa