Gula 68
Midalikyat og pauli si Rosalinda ngadto sa Pari-an. Tayming kay mao usay pag-abot ni Atty. Gumera gikan sa opisina. Wala siya mag-ukon-ukon sa iyang tuyo. Mipadayag gilayon siya ngadto sa agalon nga nagkinahanglan siya’g dakong kantidad sa salapi alang sa pagpatambal sa iyang amahan.
“Kinahanglang masemento ang paa ni Tatay,” nagkanayon si Rosalinda nga kahilakon sa atubangan ni Atty. Gumera.
“Pila may imong gikinahanglan?” Pakisayod sa agalon.
“P25,000.00. Kun mosalig ka, Atorni, sa pagpautang nako sa maong kantidad, ako kining bayran pinaagi sa pagsilbi kanimo hangtod nga mabayran ko ang maong utang.”
“Ayaw una hunahunaa pagkakaron kun unsaon mo pagbayad ang imong mautang kanako. Maoy importante ang kaayohan sa imong amahan.”
“Makapautang ka ba kanako sa maong kantidad, Atorni?”
“Nganong dili? Magpautang man gani ko sa laing tawo? Ikaw pa kaha nga duol sa akong kasingkasing?”
Wala na motubay si Rosalinda sa gisulti sa iyang agalon. Nakasabot siya sa pasumbingay niini apan wala na kini niya hatagi og pagtagad. Ang mahinungdanon alang kaniya mao nga matambalan ang iyang amahan. -- Sumpayan pa