Idlas ang katumanan sa gugma

Gula 63

“Sa sinugdan mao usab kana ang akong pagtuo. Hangtod nga miabot ang panahon nga natugkad nako sa hingpit ang matuod kong gibati nganha kanimo.”

Wala motingog si Lonia. Bisan landong na lang sa pangagpas, wala gayod siya magdahom nga mangulitawo si Mike kaniya.

“M-may paglaom ba ang akong gugma, Lonia?” Misukit si Mike pagkilab sa pipila ka daklit.

Wala siya motubag. Naghinuktok siya. Iyang gitugkad kun may pagbati usab siya alang kang Mike.

“Nagpaabot ko sa imong tubag, Lonia,” ni Mike.

“Hatagi una ko’g igong panahon sa pagtimbangtimbang nianang butanga, Mike,” matud ni Lonia. “Dili pa ko makahukom sa pagkakaron.”

“Andam kong magpaabot, Lonia. Apan hinaut unta nga dili ko nimo pakyason.”

Gisugdan dayon ni Lonia pagsulat ang iyang series of novels. Ang Kapalaran series maoy iyang giuna. Tibuok na ang iyang plano alang sa serye sa maong nobela. Mokabat sa trayenta ka pocketbook ang iyang sulaton sa maong serye.

May plot na siya sa maong series. Gani nahikay na niya ang storyline niini. Maong nagsugod na siya’g ugba sa maong estorya. Ganado kaayo ang iyang hunahuna nga midikta sa iyang mga matahom nga mga esena nga gihulagway sa iyang handurawan. -- Sumpayan pa