Gikuninitan sa mga ulitawo sa baryo Bahak ang guwapang babaye nga taga siyudad nga namista sa probinsiya. Seksi ug bigot gayud ang puting lawas ni Ara nga nag-istar sa balay sa magtiayong Henry ug Linda.
Kada gabii, bisan nahuman na ang pista sa baryo, daghang mga ulitawo ang mamisita sa balay ni Henry. Nagbirig-birig sila si Boy, Jimmy, Nelson, Mar, Rey ug Ronie. Sus, miapil sab ko’g posing ngadto sa babayeng siyudadnon. Di ikalimod nga naibog sab ko ni Ara, uy! Nangindahay sab nga unta, ako ang makaangkon sa gugma sa seksi ug bigot nga dalagang siyudadnon. Sus, kalalim kaha sa iyang bigot nga lawas nga siyapulon ug romansahon.
Apan kanamong tanan nga nagbirig-birig sa dalagang siyudadnon, si Boy gyud ang nakabentaha kanamo. Gawas nga turkohon ang iyang kaguwapo, anak pa gayud siya sa tubig-tubigan nga magtiayon sa among baryo, nga nanag-iya og halapad nga kalubihan ug dako nga grosering tindahan.
Si Boy nga bugtong anak sa magtiayong Noy Binog ug Nang Maylit, maoy nabantog nga labing higal nga ulitawo sa among baryo. Ang tanan niyang mga uyab sa among baryo, mabatan-on, maedaran ug mabiyuda man, pulos gayud niya pusgayon ang mga kaputli niini. Maoy hinungdan nga matag gabii, kaming kaulitawhan, di gyud makaatraka sa pagpangulitawo kang Ara. Pirmeng sikit si Boy sa kiliran sa dalagang siyudadnon.
"Bay Fred, wa gyud tay bawot ni Boy...!" usa ka gabii niana mihunghong kanako si Jimmy, samtang naniid mi nilang Ara nga sikit kaayong nagtupad sa paglingkod sa lantay'ng kawayan sa natad sa balay sa magtiayong Henry ug Linda.
"Bitaw, Bay Jim...!" paundayon ko kang Jimmy. "Kay sa akong paniid, nagkauyab na gayud sila si Boy ug Ara. Hayahaya sa higal nga tugahok, uy...!"
Kay sa tinuod lang, kadaghan na nako hisakpi sila si Boy ug Ara nga kada gabii adto gayud maglublob sa karaang kamalig. Nakapamuso na ko kanila. Sus, tagbawa gyud ni Boy nga kanunay'ng maghagbok sa pagbugha sa bigot nga puting lawas sa babayeng siyudadnon. Sila si Nelson, Jimmy, Mar, Rey ug Ronie, igo na lang gyud naglaway kang Boy nga maoy nakaangkon sa gugma ni Ara. Hasta ko, misurender na sa kaabtik ni Boy sa mga babaye.
Pagkasunod adlaw, may mga polis nga kalit nahibutho sa balay nila ni Henry-Linda. Sa kahibulong sa baryohanon, gidakop si Ara sa mga polis, human ipakita ang warrant of arrest alang sa babayeng siyudadnon.
"Siya ang babaye nga dugay nang gipangita sa kapolisan sa siyudad! Aduna siyay makatakod nga sakit nga AIDS!" matud sa opisyal sa polis nga maoy nangunay sa pagposas kang Ara.
Nag-aper ming tanan si Jimmy, Nelson, Mar, Rey ug Ronie. Si Boy nga buot untang mosanta sa pagdakop sa mga polis sa iyang uyab, kalit lang nga nangluspad ang dagway pagkasayod sa kamatuoran bahin sa makatakod nga sakit ni Ara.
Nakapanglingo ko. May linugdangan gayud ang kahigal ni Boy! (Kataposan)