Gula 65
“Unsa man kunoy iyang tuyo?”
“Importante gyud kaayo. Mianhi siya aron pagpahibawo nimo nga nadisgrasya ang imong amahan.”
“U-unsa?”
“Mao kana, Day. Gisungag kuno kini sa kabaw. Atua kuno karon ang imong amahan sa tambalanan nga maoy labing duol sa inyong dapit.”
Tumang kabalisa ang gibati ni Rosalinda pagkasayod sa maong hitabo. Mora siya’g natarantar. Wala na siya masayod sa angay niyang buhaton.
Nabalaka pag-ayo si Rosalinda sa gitaho ni Tasing. Tiaw ba nga gisungag sa kabaw ang iyang amahan? Malagmit ang kabaw tingali niini nga igdadaro maoy nagsungag sa iyang amahan. Ang iyang gikabalak-an karon kun unsa nay kahimtang sa amahan -- kun luwas na ba kini sa kakuyaw.
“K-kanus-a lang kuno kini nahitabo, Nang?” Gipangutana ni Rosalinda si Tasing.
“Wa ra ba ko makapangutana, Day,” matud ni Tasing. “Unsaon nga nagdali-dali man sab gud tong imong uyoan nga nagpahibalo. Basta nagtugon siya nga papaulion ka gyud karong adlawa. -- Sumpayan pa