Idlas ang katumanan sa gugma

Gula 61

Nakasabot si Lonia nga siya’y gipadungog-dungog sa duha. Apan wala lang niya hatagi’g bug-at nga pagtagad ang ilang gisulti. Dili siya guilty sa ilang gisulti tungod kay dili man tinuod nga misipsip siya ngadto sa editor. Naningkamot siya mao nga nakabaton og pagsalig ang publikasyon kaniya.

Misantop sa hunahuna ni Lonia nga tingali nasayod na ang duha nga bag-o pa lang siyang nakapirma og kontrata alang sa pagsulat og series of novels maong misamot ang gibati nilang kasina ngadto kaniya.

Misaylo sila kang Lonia nga nagpunay og bagulbol. Wala lang gayod sila tagda ni Lonia bisan klaro kaayong siya’y gipasabot sa masakit nilang sinultihan. Milahos na siya ngadto sa accounting department.

“Congratulations,” gipahalipayan si Lonia ni Mike. “Nakabalita ko nga nakapirma ka na’g kontrata sa pagsulat og series. May napili ka na bang title?”

Nagkita sila sa kantena sa buhatan sa UCV Romances. Ingon sa gikalipay usab ni Mike ang nakab-ot niyang kalamposan sa panulat.

“Duha ka title ang akong gipilian,” matud ni Lonia.“Ang kapalaran series ug ang Himaya series.”

Managsamang nindot kanang maong mga ulohan. Pero kun ako pa sa imong dapit, I would prefer the kapalaran series.”

“Kana usab ang akong preferred title. Tingali kun mahatagan pa’g laing kahigayonan, sulaton usab nako ang Himaya series.”

“Kun gihinayon pa gyud nimo ang pag-quit sa panulat, moabot kaha kining maong nindot nga kahigayonan sa imong career?”

“Dili gyud. Mao nga dako kaayo ang akong pagpalasamat nimo tungod kay ikaw ang nagdasig nako nga magpadayon sa pagpanulat.” -- Sumpayan pa