Idlas ang katumanan sa gugma

Gula 60

“Husto ka. Ang kakugi ug paningkamot maoy gikinahanglan sa magsusulat nga gustong motunhay niining maong industriya.”

Paggawas ni Lonia gikan sa buhatan ni Rev Florentino, iyang gikasugat si Mylene de Jesus. Nakugang siya sa pagkakita niini. Apan kadali rang napapas ang mao niyang kahikugang. Misantop sa iyang hunahuna nga dili na siya angay mahibulong kun makita niya si Mylene sa buhatan sa UCV Romances tungod kay girlfriend man kini ni Rev.

Gitimbaya ni Lonia si Mylene. Iya kining gipahiyoman. Apan wala siya tagda niini. Nanglimuok dayon kini dayong talikod kaniya ug mipadayugdog paingon sa pultahan sa buhatan ni Rev.

Mipakibo na lang si Lonia sa iyang abaga. So what kun dili ko nimo tagdon? Hunghong ni Lonia sa iyang kaugalingon dayong lakaw. Dili magsakit ang iyang tiyan kun dili siya tagdon sa snobbish nga girlfriend ni Rev.

Milahos siya sa third floor diin didto nahimutang ang accounting department aron pagkuha sa iyang tseke. Apan ingon sa gisungog gayod siya sa kahigayonan. Iyang nasugatan sa may hagdanan si Bernadith Medrano ug Hilda Neri, ang duha sa pipila ka regular writer sa UCV Romances nga dayag kaayong mipakita sa ilang kasina ngadto kaniya.

“Niay writer dinhi nga sipsip kaayo sa editor,” nagkanayon si Bernadith. “Mao nga bisan bag-o pa siyang magsusulat nahatagan dayon og dakong break.”

“Bitaw,” tubag ni Hilda. “Nalupig na hinuon kitang mga pioneering dinhi sa UCV Romances.” -- Sumpayan pa