“Okey na kami,” ni Lonia pa. “Peace na ming duha.”
“Maayo hinuon,” ni Mike nga ingon sa nahinangop. “Dili man gud maayo kun magpabilin ang gap tali kanimo ug ni Rev.”
“Bitaw,” ni Lonia.
“Karon gusto kong mo-concentrate ka na'g maayo sa panulat. Nakita ko ang dakong improvement sa imong sinulatan. I think, dili na kinahanglang pa-edit-tan mo pa kini kanako. Idiretso na lang og submit ngadto kang Rev ang sunod nimong mga nobela.”
Misamot ang kahapsay sa dagan sa career ni Lonia isip nobelista. Gikagubtan sa mga bookstore ang iyang mga nobelang pocketbook. Ang kadaghanan sa iyang mga nobela nag-second, third ug fourth reprint na.
Nagpadayon usab siya sa pagtagik og bag-ong mga obra. Samtang nagkadugay sa pagsulat, misamot pagsugwak ang matahom nga mga ideya sa iyang alimpatakan. Dili siya makabsan og sulatonon. Iyang nadiskubrehan nga ang daghang materyal nga sulaton alang sa usa ka nobela anaa ra sa iyang palibot.
Gumikan sa tulin nga pagsulbong sa ngalan ni Lonia sa natad sa panuwat, nakamatikod siya nga may mga kauban siyang regular writers sa UCV Romances nga nasina kaniya. Ang maong mga magsusulat pulos nag-una kaniya sa panulat maong nakasabot si Lonia kun nganong nasina sila kaniya. -- Sumpayan pa