Ang maya sa halwa

Nagsubo si Bokbok. Namtikdan niya ning buntaga nga wala nay kadasig ang langgam maya sa sulod sa halwa. Masulub-on kini nga nagtug-don sa hinimong tugdonanan. Nagluya. Nagpitokpitok ang mga mata sa maya. Gani, wala na kini motuktok sa gihatag ni Bokbok nga pagkaon.

Sa miaging semana, hilabihang lipaya ni Bokbok sa dihang paghiabot sa iyang Papa Boy gikan sa gitrabahoan niining pabrika sa sapatos, nagbitbit kini og usa ka halwa nga may sulod nga langgam may. Hilabihan ka abtik ug kaluhag sa maya sa sulod, nga sa matag karon ug unya, mokupokupo ug mohana sa paglupad, sa pamasin nga makalusot sa gingi sa halwa aron makalingkawas ug molupad paingon sa gawas.

“Dong Bok, gipalitan tika og langgam maya, apil na ang iyang halwa!” nagpahiyom ang iyang Papa Boy nga mihigot dayon sa dalang halwa ug gibitay sa ilang bentana.

“Uy, katahom sa maya! Naa ay, abtik kaayo nga nagluksolukso sa sulod! Paninguhaa nga dili makagawas sa halwa, Dong Bok, samtang magdula-dula ka sa maong langgam...!” pasidaan usab sa iyang Mama Ipen ngadto kang Bokbok.

Buntag ug hapon nga gigalam ni Bokbok ang maya. Patuktokon niya sa pagkaon matag buntag sa dayong gikan niya paingon sa eskuylahan. Ug inigkahapon, patuktokon na usab niya ang maya inig-abot niya gikan sa eskuylahang elementarya sa Grade Five nga iyang gi-eskuylahan. Adunay higayon nga ipagawas ni Bokbok ang maya sa sulod sa halwa, ibutang sa iyang palad ug hapuhapon. Hangtod nga namatikdan niya nga nawad-an og kadasig ang maya. Nagtungok ug nagluya sa sulod sa halwa.

Gikuha ni Bokbok ang maya sa sulod sa halwa. Gibati siya og kaluoy sa langgam. Nakahukom siya. Bahala nag masuko ang iyang Papa Boy ug Mama Ipen kaniya. Hatagan niya og kagawasan ang nagluyang langgam. Gibutang niya ang maya sa iyang palad ug gihapuhap. Mikanaog si Bokbok sa ilang natad. Gitayhupan niya ang maya. Giitsa sa ibabaw. Mikapakapa ang maya sa iyang mga pako. Milagsik. Unya, malipayon nga milupad ang maya palibot sa balay. Malipayon kining mitugdon sa gamay'ng sanga sa kaymito

“Dong Bok, gibuhian nimo ang maya...?” singgit sa iyang Papa Boy nga nag-ilis na niadtong buntaga aron moadto na sa iyang trabahoan.

“Hala, nakabuhi ang maya! Kaanugon sa langgam...!” misagbat usab ang iyang Mama Ipen nga mitambo sa bentana ug mitutok sa halwa nga wa nay sulod.

“Luoy man god ang maya sulod sa halwa, Pa, Ma! Wa siyay kalipay. Nagluya. Magtungok! Wa siyay kagawasan sa paglupad! Tan-awa ninyo siya, pagkamalipayon niya nga naglupadlupad sa kahanginan nga nakaangkon sa kagawasan..!” ni Bokbok nga mitudlo sa maya nga misulbong paglupad sa kahitas-an nga lagsik na kaayo.

Igo lang nga nagyangoyango sila Boy ug Ipen nga nakasabot sa gibuhat sa ilang anak ngadto sa maya. (Kataposan)