Kadtong lungon nga nagbabag sa dalan

Sa akong pagbakasyon sa isla sa Poro, Camotes, didto ko istar sa akong uyoan nga si Tiyo Doy. Mingaw ang maong dapit ug kalagmitan, mga habalhabal maoy nagdasok sa Poro nga magbahasbahas pagdagan sa gamay ug sigpit nga dalan. Dili usab sikit ang kabalayan sa Poro.

Sa duha ko ka semanang istar sa ilang Tiyo Doy ug Tiya Seria, nasuod ko ang bugtong nilang anak nga si Eddie (akong ig-agaw) ug kanunay na kaming manuroy sa matahom nga lapyahan sa dagat nga duha ka kilometro ang gilay-on, gikan sa ilang balay. Maagian namo daplin sa dalan ang usa ka dakong punoan sa dakit nga matud pa ni Tiyo Doy ug Tiya Seria, taw-an ug abatanan kuno.

"Ayaw gyud mo'g pagabii kun mosuroy mo sa baybayon, Ed, Don! Kuyaw kun abaton mo inig-agi ninyo sa dakong punoan sa dakit!" pahimangno ni Tiyo Doy kanamong Eddie.

"Bitaw, Don, Eddie! Daghan na baya ang giabat anang dakong punoan sa dakit. Lainlaing makahahadlok nga talan-awon ang mobabag nianang punoan sa dakit...!" mitimang sab si Tiya Seria nga mitutok nako.

Tungod kay daghang mga dalagang naligo sa baybayon niadtong hapona, nagabhian gyud mi si Eddie sa among pagpauli paingon sa Poro. Dugay ming huwathuwat kun wa bay masaag nga habalhabal nga kasakyan. Apan wala gyuy nasaag, mao nga napugos na lang gyud mi si Eddie sa paglakaw aron sa pagpauli sa ilang balay. Diha na ko kahinumdom sa dakong punoan sa dakit, dihang nagdangadanga na mi si Eddie.

"Pasigaa ang imong layter, Ed...!"

"Bitaw, Don! Wa man ta makahimo og sulo nga langkay...!"

"Ed, duol na ra ba ta sa punoan sa dakit...!"

"Bitaw,l Don! Andam lang tas atong kaugalingon, kay seguradong abaton gyud ta ning gabhiona...!"

Ug tuod man, dihang nahitungod na mi si Eddie sa dakong punoan sa dakit, kalit mi nga napahunong sa among paglakaw. Klaro kaayo sa among panan-aw nga mibabag sa dalan ang usa ka lungon nga gilibutan sa daghang kandela nga nagsiga.

"Ed, lungon nga nagbabag sa dalan...!"

"B-bitaw, Don...!"

Nanlimbawot ang akong balhibo.

"Don, moihap kog katulo! Dayon, magdungan tag layat sa lungon ug mosutoy tag dagan...!"

"Sige, Ed.....!"

Human makaihap og katulo, nagdungan mig lukso si Eddie lagbas sa lungon nga nagbabag sa dalan. Misutoy mi'g dagan si Eddie pauli sa balay nga naghangos. Porbida, nakatuo gyud ko nga taw-an ang maong dakong punoan sa dakit. Dugay na kadtong hitaboa, apan hangtod karon, giisip ko kadto nga makahahadlok nga kasinatian. (Kataposan)