Idlas ang katumanan sa gugma

 Gula 55

Mibalik ang kahapsay sa dagan sa career ni Lonia. Si Mike kanunay naghatag kaniya’g mga tips mahitungod sa epektibong pagsulat og nobela. Iyang gisilsil sa iyang alimpatakan ang tanang gipanudlo ni Mike kaniya mahitungod sa panulat partikular na sa fiction.

Hangtod niining higayona, wala pa gihapon makigkita si Lonia kang Rev. Si Mike ra ang iyang palihugon sa pag-submit sa iyang manuskrito ngadto sa editor. Moadto lang siya sa buhatan sa UCV Romances kun mopirma siya’g kontrata ug mo-claim sa iyang tseke.

Apan dili gayod siya molahos ngadto sa opisina ni Rev aron pagpakigkita niini. Bisan gani ang mga text niini dili niya tubagon. Kun mo-text kini kaniya aron pagpahibalo nga aprubado na ang iyang mga nobela ug puyde na siyang mopirma og kontrata, igo lang siyang magpasalamat ngadto niini. Dili na niya tubagon ang sunod pang itext niini kaniya.

“Maayo tingali nga makigkita ka na kang Rev,” sugyot ni Mike usa ka higayon niana sa ilang panagkita sa usa ka luhong kan-anan sa Mango Square. “Dugay ra siyang nagpaabot nga makigsulti ka niya. Gani, nakahunahuna man siya nga siya mismo ang mangitag paagi nga magkasulti kamo aron magkauli ang inyong masigka kabubut-on. Apan nabalaka siya nga tingalig dili nimo siya tagdon.”

“Mauwaw ko, Mike,” matud ni Lonia.

“Unsa may imong kauwawan? Rev has nothing against you. Kamatuoran niini, gidawat na niya ang imong mga nobela.”-- Sumpayan pa