Idlas ang katumanan sa gugma

 Gula 54

Wala makatingog si Lonia. Tinuod ang gisulti ni Mike. Dali ra siyang ma-discourage. Mao kini ang iyang weakness. Dili siya maantigong moharong sa mga pagsulay. Ang iya rang nakamaohan mao ang paglikay sa mga gumonhap, dili ang pagharong niini.

“Mauwaw na ko, Mike,” ni Lonia pa. “Nagkalantugi man gud mi si Rev.”

“Wala kay angay kabalak-an,” ni Mike pa. “Masinaboton si Rev. Ug naghulat siya sa imong pagbalik sa pagpanulat.”

Naghinuktok na usab si Lonia. Unya nahinumdom siya niadtong panahon nga gihagkan siya ni Rev. Human niadtong maong hitabo, ingon sa mauwaw na siyang makig-atubang kang Rev.

“Hunahunaon ko pa kana’g maayo, Mike,” matud ni Lonia. “Sa pagkakaron, mora’g dili pa ko andam nga makig-atubang kang Rev.”

“Dili kana problema,” matud ni Mike. “Mahimo man nga ako lang una ang mo-submit sa imong mga nobela ngadto kaniya samtang dili ka pa andam nga makig-atubang niya. Ug kun okey ra nimo, dakong edit-tan ang imong mga sinulat aron pagseguro nga dili gayod kini mountol inig-submit nato niini ngadtokang Rev.”

Nasuta ni Lonia nga tinud-anay ug kinasing kasing ang tinguha ni Mike sa pagtabang kaniya maong wala niya usiki ang kahigayonan. Misanong siya sa awhag niini. Mibalik siya sa pagpanulat.

Sumala sa ilang gikasabotan, si Mike ang unang mag-edit sa mga nobela ni Lonia sa dili pa kini i-submit ngadto sa editor. Tuod man, misalir ang ilang paagi. Kanunay makapasar ang mga nobela ni Lonia sa editorial policies and standards ni Rev Florentino. -- Sumpayan pa