Idlas ang katumanan sa gugma

Gula 52

Nagpabilin sa pagpakahilom si Lonia.

“Abi mo, Lonia,” ni Mike pa. “Dili baya gyud kalikayan sa writer ang mga rejection sa iyang sinulat. May mga higayon man gud nga dili kita makakita sa atong mga sayop diha sa atong mga sinulat. Ang editor maoy motul-id sa maong sayop kun iya kining makit-an.”

Wala gihapon motingog si Lonia. Gipalugdang niya sa iyang hunahuna ang tanang gisulti ni Mike.

“Buotan baya si Rev,” matud ni Mike. “Usa siya ka maayong laking editor. Estrikto gyud siya bahin sa trabaho. Kusog mo-criticize sa sinulat sa mga writer. Ako lang, daghan kaayo ang mga sinulat nga gi-reject niya kaniadto. Pero tungod sab niya, nakakat-on ko gikan sa akong mga sayop.”

Naghinuktok si Lonia. Nahinumdom siya karon nga kausa niana giingnan siya ni Rev nga kini ang numero uno niyang kritiko sa panulat. Karon inanay na niyang nasabtan ang unod sa gisulti ni Rev kaniya kaniadto.

“Tungod sa pag-agak ni Rev kanako,” ni Mike pa, “ako na ang highest paid novelist karon sa UCV Romances. Pero kun wa pa ko maminaw sa iyang mga tambag ug sa mga tips sa panulat nga iyang gitudlo, tingali wala na usab ako karon niining maong industriya.”

“U-unsa pay laing gisulti ni Rev kanimo?” Mipalain si Lonia. “A-ang buot kong ipasabot, gawas sa panulat, unsa pay lain niyang gitug-an nimo? -- Sumpayan pa