Gula 50
Kay sa tinuod lang, wala man gayod usab siya magpaabot nga higugmaon siya ni Rev. Kinsa man siya nga puniton ni Rev? Nasayod siya nga dili ikatandi ang iyang abilidad sa panulat sa success sa career ni Mylene de Jesus isip usa ka journalist. Samot na karon nga mihunong na siya sa pagpanulat.
Nahisama siya sa usa ka bituon nga misidlak lang sa makadiyot ug unya miawop lang usab dayon ang kahayag. Kadali rang na-established ang iyang ngalan sa natad sa panulat tungod sa best seller niyang mga nobela. Apan wala siya makalahutay sa pagpabarog og estatuwa sa iyang kaugalingon sa natad sa panulat kay mubo ra man ang hunat sa iyang kadasig.
Si Rev ang naghatag og kadasig kaniya sa pagpanulat. Apan si Rev ra usab ang nagpawong sa mao niyang kadasig. Kadiyot ra kaayo ang iyang pag-enjoy sa kabantog sa natad sa arte.
Hinuon, wala siya magmahay nga iyang giabandonar ang iyang propesyon isip usa ka magtutudlo aron unta i-pursue ang iyang hilig sa creative writing. Charge to experience na lang ang tanan. At least, nasayod na siya karon kun unsa gayod ang haom alang kaniya.
“Kumosta ka?” Maukitong pangutana ni Mike.
Wala damha ni Lonia ang pagbisita niini kaniya karong buntaga. Diha sila sa sala ug nag-atbang sa paglingkod sa sopa.
“Maayo man,” mubong tubag ni Lonia.
“Dugay-dugay ka nang wala mosulat og pocketbook,” ni Mike pa. “Gimingaw na nimo ang imong mga fans. Giiliw na nila ang imong mga sinulat.” -- Sumpayan pa