Balonon sa langit

Bisan asa ka, uban ako. Kanang imong gugma ihatag na. Pagkamingaw sa lubnganan, nga imo mang gitalikdan. Nalimot ka na ba, sa luha ning mata ko, nga mingtubod kay gibiaybiay..." ninglanog ang awit sa batan-ong babaye nga gipatukar sulod sa private room sa Green Meadow Medical Center.

Si Delia ang nagpatukar niini sa iyang portable CD player. Gipreserbar gyud niya ning awita ni Nomer iyang kapikas nga coma na karon. Hinayhinay nga gitangtangan si Nomer sa dekstros ug uban pang tubo nga gikabit sa iyang lawas aron unta masumpayan pa iyang kinabuhi. Nitulo ang luha ni Delia nga nagsud-ong sa iyang bana.

"Balunon ko sa langit ang maong awit!" ni Nomer sa unang higayon nilang panagkita usa ka gabii. Bisperas to sa pista sa baryo Anislag, lungsod sa Alegria. Gigalgal si Nomer ni Rudy nga mamista didto sa mga paryente sa naulahi. Clerk/typist si Rudy ni Atty. Anton Perez amahan ni Nomer. Wa pay trayenta si Nomer adtong higayona. Ulitawo pa. Ug gikang nakagawas sa Rehab Center kay naadik sa ginadiling drugas. Aron malingaw si Nomer, gitugtan siyang makakuyog ni Rudy sa Anislag. Nangharana sila adtong gabhiona sa balay ni Delia.

"Walay bulak nga ikadayandayan, kundi gugmang way paglubad. Kinabuhi, kanimo ihalad. Mag-antos man, way sapayan..." nadasig si Nomer sa pagkanta sa iyang komposisyon dihang nakita niyang nanambo si Delia sa bintana. Nahibulong si Nomer nga ang tubag ni Delia sa iyang harana, sugot man dayon nga awit. Mao toy sugod sa ilang panagkaila, dayon panagsuod ug panaghigugmaay. Nakahukom si Nomer sa pagbiya sa tanang bisyo aron malimpiyo iyang kaugalingon nga gihalad niya kang Delia. Nalipay kaayo iyang amahan nga nabag-o si Nomer tungod ni Delia. Gipakasal dayon sila dangtag usa ka tuig. Ug gigastohan silang duha nga makaeskuyla kay kabos kaayong mga mag-uuma ang mga ginikanan ni Delia.

Nahimong usa ka CPA si Nomer. Nigradwar og B.S. Secretarial si Delia nga mao ra say sekretarya ni Nomer. Kada tuig sa ilang wedding anniversary, patukaron pirmi nila ilang duha ka awit nga maoy nakapadani nila sa usa'g usa. Nakaanak silag tulo puro lalaki. Si Elmer ang kamaguwangan. Ikaduha si Jimmy. Ikatulo si Pitoy. Nakahuman na silang tulo og kurso apan ulitawo pa. Gusto silang motabang sa ilang mga ginikanan alang sa ilang mga panginahanglan. Si Nomer, tungod sa kabun-og sa iyang lawas sa iyang mga bisyo kaniadto (drugas, inom, sigarilyo), diyotdiyot na lang atakehon sa hayblad. Ma-stroke siya hapit kada tuig. Niining iyang katapusang stroke nga nag-edad na siya'g 66 sa ika-trayenta i-sayes nga tuig sa ilang kaminyoon, nabugtuan og ugat sa ulo si Nomer.

Sulod sa napulo ka adlaw niya sa ospital, nag-anam-anam si Nomer og ka way buot. Sa ikaduhang adlaw, makasulti pa siya. Sa ikatulong adlaw, magtotok nalang nga way makita. Sa ikaupat nga adlaw, magsige na lang siya'g katulog. Nasayod siya sa iyang kahimtang. Gisultihan siya sa doktor nga puwede pa siyang operahan. Apan way sigurong molampus ang operasyon. Gasto lang. Busa nihukom siya nga matulog na lang nga magpaabot sa iyang kamatayon.

Dangta'g lima ka adlaw sa ospital, coma na siya.

Nag-alirong karon ang ilang mga anak sa gamay'ng lawak sa ospital. Diha sab ang mga igsoon ni Delia. Way nitambong nga paryente ni Nomer kay patay na iyang mga ginikanan. Bugtong siyang anak.

Paghuman og tangtang sa tanang mga plastik nga mga tubo sa lawas ni Nomer, nibiya na ang mga nurse. "Mer, naghulat sa gawas ang ambulansiya nga sakyan nato ngadto sa atong balay sa Canduman" ni Delia sa masulob-ong pulong. Nagsige pa'g tingog ang awit niya gikan sa CD player. Nikitoy ang mga tudlo ni Nomer sa tuong kamot. Nibuka iyang mga mata nga morag nagduka. "Ba-lo-non ko saaa-laa-ngiiit ang i-mong aaa-wit" ni Nomer nga naghagawhaw nga putol-putol. Ug nipiyong siya'g balik.

Naghingos ug nagpamahid sa ilang mga mata ang nanag-apong. Labi na si Delia. Hilom nga nagdangoyngoy si Delia. Apan mapasalamaton gihapon siya sa malipayong kinabuhi niya sa kiliran ni Nomer. "Balonon ko usab sa langit ang imong awit" tuaw ni Delia. (Kataposan)