Honghong sa barkada

Unsa mang hitaboa nga nadasmagan man nimo ang tawo, nga kamingaw sa karsada, way laing nagdagan, ang motorsiklo ra nimong gimaneho?" maukitong sukod ni SPO4 Manto ngadto ni Edgar samtang gitambalan siya sa mga pangos sa nawong sulod sa Emergency Room sa Green Meadow Medical Center.

Ang tawong nadasmagan ni Edgar gitambalan sa laing katre. Naigo iyang likod sa manibela sa motorsiklo. Nasamad ug nabun-og ang toong bagtak kay naigo sab sa wala nga foot rest sa motorsiklo. Niresponde ang pulis sa tawag sa sekyu sa ospital nga dunay posibleng medico legal nga sitwasyon karong buntaga.

Sa kahubog nga nagmaneho sa motorsiklo sa iyang uyoan nga way rehistro, kay gipapalit siyag dugang Red Horse Grande, subay sa dalang Don Suico Street sa Pagsabungan, nakatulog si Edgar. Ang tawo nga nag-hike sa walang habig sa karsada iya gyung nahapitan. Nadakdak ang tawo. Si Edgar ni-dive sa karsada pagkatumba sa motorsiklo. Nabagnos iyang nawong sa sementong karsada. Daw nipilit siya sa yuta. Nakuyapan siyag pila ka minutos.

Pag-abot sa ambulansiya, nakamata siya. Gipangayoan siyas biktima og lisensiya ug rehistro sa motorsiklo. Wa siya'y ikapakita. Wa siya'y lisensiya. Kay wa kabarog ang biktima gikarga og estretser. Gikarga si Edgar og apil dungan sa iyang biktima. Nagkamuritsing na si Edgar sa dugo gikan sa mga pangos sa iyang agtang, kilay ug aping. Namansahan iyang asul nga T-shirt ug maong nga purol. Nikuyog niya si Rolly iyang best friend. Nagsul-ob og maong nga long pants ug orange nga T-shirt. Si Rolly ang nagsigig honghong niya kun unsay isulti sa pulis.

Nangutana ang drayber sa ambulansiya kun asa sila dad-a.

"Sa Green Meadow Medical kay mobayad ko bisag pila" ni Edgar. Gihukas iyang T-shirt nga nagkadugo. Wa siya nasayod sa iyang gipanulti. Bunga lang seguro sa kahubog. Nanghambog dalidali. Ang niabot lang sa iyang hunahuna nga may iyaan siyang nagtrabaho sa maong ospital. Nag-siren dayon.

Kamanghuran si Edgar sa tulo ka managsoong puro lalaki. Ilang kamaguwangan si Roger. Ikaduha si Glen. Mga minyo na iyang mga maguwang. Kay way nahumang kurso, wa gani kahumag hayskul, naghabal-habal drayber lang ang duroha. Si Edgar kay nakahuman og Vocational Course nga pagka-Welder, nangaplay og trabaho sa Saudi. Hapit na siya matawag. Nagalgal ni Rolly nga best friend ug barkada niya, nagsigeg inom sa ilang balay kay may nindot nga sounds. Si Rolly man kanunay bangka sa ilimnon kay may trabaho na man.

Buwag na ang mga ginikanan ni Edgar. Iyang mama nibiya sa ila ug niipon og laing lalaki. Tungod tingale kay na-stroke iyang papa ug naparalisa ang walang bahin sa lawas. May anak nang duha ka babaye iyang mama sa laing lalaki. Tagsa na lang sila magkita ni mama niya.

"Nagpatunga man god ang tawo," ni Edgar. "Unyag nagpatunga, imo diay'ng dasmagan?" sa pulis. "Akong gibusinahan, wa gyud niurong!" ni Edgar. "Kun di mourong imo diay'ng dasmagan? Unsa may buhaton nimo kun di mourong ang tawong kunohay nilabang sa karsada?' sa pulis. "Akoy mourong" ni Edgar. "Unya niurong ka?" sa pulis. Wa na katingog si Edgar. Nagpanglingi ni Rolly sa iyang tupad. Di na kahonghong si Rolly kay naa may pulis sa duol. "Bi bi. Lisensiya nimo ug rehistro sa motorsiklo" sa pulis. Nikangkang ang kamot. "Wa lagi Sir. Mangayo lang kog pasaylo sa biktima" ni Edgar. Nagminghoy. "Ambot ug kapasaylo ba na nimong biktima. Nga mao may imong pakasad-on sa disgrasya. Matud sa biktima, naglakaw ra siya sa left side. Unya ikaw gyud maoy niliko aron maigo siya. Una nimong sulti niya, nakapiyong ka kay hang imong mata. Pero ang tinuod, nakatulog kang nagmaneho," sa pulis.

Nahuwasan siya pagkasayud nga wa na diay iyang iyaan magtrabaho sa Green Meadow Medical." Arestahon ta una ka ug i-detain kay driving without license ka. Wa say helmet. Ug i-impound ko tong motorsiklo kay way rehistro" sa pulis. Nahugno si Edgar. Giagbayan siyas pulis aron dad-on na sa presinto. "Sulod sa duha ka adlaw kun di nimo maareglo ang biktima, nga di nalang mokiha, pasakaan ka namo’g kaso criminal nga driving without license," dugang sa pulis. Dakong pagbasol ni Edgar nga nipatoo sa honghong sa iyang barkada. (Kataposan)