Lovers in Pari-an

Gula 51

“Aw, kun mao kana, Day, wa na diay babag ang pagminahalay ninyo ni Bongkoy.”

“Mao kana, Nang. Ug nanghinaot ko nga si Bongkoy na gyud ang lalaki nga gitagana sa Dios alang nako.”

Udto. Samtang nanghugas si Rosalinda sa mga plato sa kosina, miduol kaniya si Tasing. May gihunghong kini kaniya.

“Gipatawag ka ni Atorni,” sa hamtong babaye pa.

“Ngano man kuno?” Sukit ni Rosalinda.

“Ambot lang. Basta kay may mahinungdanon kuno siyang isulti nimo. Tua siya sa sala. Adto lang aron atong masayran kun unsay iyang tuyo.”

Si Tasing na ang mitiwas sa gibuhat ni Rosalinda sa kosina. Miadto gilayon siya sa sala diin didto nagpaabot kaniya si Atty. Gumera.

Gikulbaan siya’g diyotay dihang nagkaatubang na sila si Atty. Gumera. Unsa man kahay sala nga iyang nahimo ngadto sa iyang agalon nga gipatawag man siya niini? Pero gilig-on niya ang iyang kaugalingon. Masaligon siya nga wala siya’y nahimong sayop ngadto ni Atty. Gumera. Tingali, lain ang hinungdan kun nganong gipatawag siya.

“M-may tuyo ka man kuno kanako, Atorni?” Nangutana siya. -- Sumpayan pa