Idlas ang katumanan sa gugma

 Gula 43

Nakamatikod siya nga may kagahi na ang tingog ni Rev. Ingon sa napikal na usab kini ug nakasabot siya kun ngano. May pagrebelde ang tono sa iyang sinultihan ngadto niini nga maoy hinungdan nga ingon sa naglagot usab kini.

“Ang nakadaot nimo kay gusto nimong itandi ang fiction sa tinuod mong kinabuhi,” nagkanayon si Rev nga misunod kaniya sa may bentana.

“Nganong nakasulti ka’g ingon niana?” Gitutokan ni Lonia si Rev.

“Dili ka makalimod kanako, Lonia. Milutaw sa imong sinulatan nga may kahimangod ka sa kalibotan. May nahiagoman kang kapakyasan ug gusto mong ipahungaw ang imong kahimangod pinaagi sa imong mga sinulat.”

“Damn you! Wa kay labot sa personal kong kinabuhi!” Mitaas na gyud og maayo ang tingog ni Lonia.

“I know. Pero angay sab nimong isilsil sa imong alimpatakan nga kun unsa may nahitabo sa imong kinabuhi, dili mo angay nga iangin niana ang imong career. Walay personalay, trabaho lang.”

“Ang gisulat kong nobela naghulagway sa kamatuoran, sa matuod nga mga panghitabo sa kinabuhi sa tawo. Dili ba nga mao man kana ang essence sa usa ka sugilanon? Dili ba nga kinahanglan man nga realistic ang usa ka sugilanon aron convincing kini ngadto sa readers?” -- Sumpayan pa