Si Uncle ug ang textmate niyang bakol

Hi...! I'm Margie of Cebu City. Wanted textmate, boy, 35 years old and above" Daling gikuot ni Uncle Jose ang iyang selpon human niya nabasahi sa Banat Inbox sa mantalaang Banat News ang maong mensahe. Nag-yangoyango ang ulo ni Uncle Jose. Gusto niya kining mamahimong ka-textmate. Ug niining paagiha, namasin siya nga sa ngadto-ngadto, mahimo niya kining hinigugma. Trantay-utso na si Uncle Jose, apan hangtod karon pabilin gihapon siyang ulitawo. Dili baya tantong bati'g nawong ang akong uyoan. Dili sad tantong gwapo. Sakto-sakto lang. Maayo usab kining mo-diskarte. Pero ang naka-parat lang kay matunong siya'g panguyab sa mga babaye nga wa sa'y gusto kaniya.

Silang Jessica, Joan, Luela, Irene, Emerenciana ug Neneth puros na gidigahan sa iyang gugma. Apan pakyas ang akong uyo-an kay igo lang siyang gihiwi-an sa kasingkasing sa mga dalaga. Mao nga hangtod karon pabilin pa gihapong ulitawo. Nakapahiyom si Uncle Jose nga nag-text-text sa iyang selpon. "Hi...! can u be my textmate. I'm Jose Sael, 38 years old" unod sa iyang mensahe nga deritsong nipaila-ila sa iyang kaugalingon timaan sa iyang ka-interesado "to-tott..t o-tttt.." Nitingog ang iyang selpon. Daling ni-reply ang maong babaye, "o sure ... I'm Margie, Margie Soron, 35 years old" mensahe sa babae nga gikalipay sa akong uyo-an.

Ug nagka-textmate gyud ang duha. Nilabay ang mga adlaw, padayon ang ilang pag text-kanay, hangtod nga nagkasabot ang duha nga magkita sila aron mahimamat ang usa'g-usa. Mahinamon ang akong uyoan. Basta magkasinabot sila, iya gyud dayon kining pangasaw-on. Bag-ong pulo, karsones ug sapatos ang iyang gisul-ob. Sinaw kaayo ang hinapay niini.

Sa Plasa Independencia sila magkita, sa alas dose sa kaudtohon. "wer na u?" mensahe sa selpon ni Uncle Jose nga iyang nadawat. Ang iyang ka-textmate na ang nangita kaniya.

"I'm coming" mubo niyang reply, nga nibati na'g gamay'ng kahinam. Siguro siya nga maka-ila ra diretso ang iyang ka-textmate kay iya man daang gi-discribed kun unsay kolor sa iyang suoton. Pag-abot niya sa Plasa, mingaw ang palibot.

Pipila lang ang mga tawo nga nanggilingkod sa lingkuranan, "abot nako, wer na u" text sa akong uyo-an nga natakdan sa iyang ka-textmate ang tenextkan. Duha lang ka babaye ang iyang nakita sa maong palibot.

Ang usa batan-on pa nga nagkukalingaw og basa og pocket book. Samtang ang usa, takdo-takdo ang pangidaron sa gisulti sa iyang ka-textmate. Mistisahon kini, gwapa, puti, ug bigot ang panglawas, ug mapahiyomon kining nagtextext sa iyang selpon. " Unta'gggg ... mao na siya ang akong ka-textmate Ginoo...." pangaliyupo sa akong uyo-an nga naka-panakla nga nag-tutok sa maong babaye.

Dako ang iyang pagtuo nga mao gyud kining mestisahong babaye ang iyang ka-textmate kay nagkupot man og selpon ug takdotakdo usab ang pangidaron.

"Hi ... Jose, I'm here" tingog sa babae nga nag-sampit sa ngalan ni Uncle Jose gikan sa iyang luyo. Paglingi niya, maoy iyang nakita ang babae nga puwa kaayo'g ngabil nga naghapa nga nagsakay sa gamay'ng kariton nga gitulodtulod gamit sa usa ka kamot niini, samtang ang usa ka kamot nagkupot og selpon. "Hi...! it's me ... Margie" sa babaye nga nagsakay og kariton ug mahangponon nga mipaduol kaniya. Niti-urok si Uncle Jose sa iyang nakita, "ayayayyyy...! siya akong ka-textmate? Butangi...! abi ko ba'g kadtong babae'ng mistisa. Pagka-toytoy niani oy ... bakol ang akong ka-textmate.

Sus ang igat, ka-puwa ra ba'g ngabil" ni Uncle nga sa hilom nagkibotkibot ang baba niini. Apan sa gihapon, iya nalang gipakita nga mahangpunon usab siya sa ilang panagkita ug gitunol ang iyang usa ka kamot aron makiglamano sa iyang ka-textmate nga usa ka bakol. (Kataposan)