Idlas ang katumanan sa gugma

Gula 35

Mikatawa si Rev. “Dinhi sa UCV Romances, wala kita magtigi kun kinsa gyud kanato ang maayong laking writer. Ang importante mao nga makasulat kita’g nindot nga mga nobela nga atong ikadalit ngadto sa mga magbabasa aron sila malingaw. Ug usa ka sa akong gisaligan nga makahimo niini.”

“Salamat sa imong pagsalig,” matud ni Lonia. “Maningkamot kong dili ka ma-disappoint sa akong performance.

Pagkaugma, samtang nagsulat si Lonia og storyline sa laing nobela nga gusto niyang sulaton, mitingog ang message alert tone sa iyang cellphone.

Mihunong siya pagmakinilya ug gikab-ot ang cellphone nga gipatong sa lamesa nga mao ra usay gipatungan sa makinilya.

Si Rev ang nag-text kaniya. “See me at the ofis immediately. We have sum m4tant matters to be discused.”

Kalit lang gikulbaan si Lonia pagkabasa sa maong text. Iyang natugkad sa mensahe ni Rev nga dinalian ug importante kaayo ang tuyo niini kaniya.

Apan ang maong kakulba nga gibati ni Lonia kalit lang usab nga ingon sa gitapdas sa hangin. Misantop sa iyang hunahuna nga tingalig may maayong balita na usab si Rev alang kaniya nga dili mahimong ipaagi lang sa text ang pagpahibalo niini kaniya.

Maong nakahukom siyang makigkita kang Rev. -- Sumpayan pa