Gula 34
Gi-submit dayon niya ang duha ka nobela nga iyang nahuman pagsulat ngadto ni Rev. Nasayod siyang dugay rang nagpaabot si Rev sa iyang manuskrito ilabi na kay in demand kaayo ang iyang mga nobela.
“Dugay ka man kaayong naka-submit?” May kahibulong ang pangutana ni Rev. “May lain ka bang gika-busy-han?”
“Wala baya,” mubo niyang tubag. “May kakulian lang sa lawas maong wala ko maka-concentrate pagsulat.”
Wala niya tug-ani si Rev sa matuod nga hinungdan sa pagkawagtang sa maayong kondisyon sa iyang hunahuna sa pagsulat.
“May good news ko para nimo,” nagkanayon si Rev.
“U-unsa man kana?” Sukit ni Lonia.
“Na-sold out na ang imong mga nobelang Gugmang Nakawang ug Kamatayon sa Paglaom sa mga bookstores. Tungod niini, mi-decide ang kadagkoan sa UCV Romances nga maghimo og reprint sa maong mga pocketbook.”
“Gikalipay ko ang maong balita.”
“I hope nga magpadayon ang imong kakugi sa pagsulat. Misalig ko nimo. Akong nakita nga kusog kaayong miuswag ang imong writing ability. Ikatandi ka na sa mga beteranong nobelista.”
“Daghang salamat sa imong pagdayeg. Pero para nako, daghan pa ko’g kan-ong bugas aron makatupong sa abilidad sa mga beterano.” -- Sumpayan pa