Idlas ang katumanan sa gugma

Gula 32

Gipugos niya ang iyang kaugalingon aron makasulat. Apan misangko na hinuon kini sa iyang kalagot. Daghang sayop ang iyang gisulat. Mao nga napikal siya. Gibiyaan niya ang iyang makinilya ug giparelaks ang iyang hunahuna. Tingali na-pressure lang siya sa daghang gihunahuna maong nakasinati siya’g ingon niini.

Pagkasunod adlaw gibalikan niya ang nasugdan niya pagsulat nga nobela aron kini tiwason. Wala pa mobalik sa hustong kondisyon ang iyang hunahuna apan iya kining gipugos. Kinahanglang mahuman na niya ang maong nobela kay basin pasabmiton na usab siya ni Rev Florentino.

Nag-aginod ang iyang pagsulat. Mas dako ang panahon nga magugol sa hinuktok kay sa pagdukdok sa mga tekla sa makinilya, timaan nga hinay kaayo ang dikta sa iyang hunahuna sa unsay angay niyang isulat.

Naglagot siya sa iyang kaugalingon. Sukad lang nga iyang nasayran nga may girlfriend na si Rev, ingon sa kanunay na lang gubot ang iyang hunahuna. Kanunay siyang absent-minded hinungdan nga wala sa hustong kondisyon ang iyang hunahuna sa pagsulat.

Mao kini ang iyang weakness. Dali ra siyang ma-disappoint sa higayon nga modangat ang usa ka panghitabo nga wala niya damhang mahitabo. Dali ra siyang matarog ilabi na kun ang problema may kalabotan sa kasingkasing. Huyang ba siya’g fighting spirit? -- Sumpayan pa