Gula 35
“May problema ka ba?”
“Wa man. Ug kun may problema man ko makasugakod ko sa pag-atubang niini. Anad na ko sa mga problema.”
Daklit nga mipatunga nila ni Rosalinda ug Bongkoy ang paril sa kahilom. Walay usa kanila nga gilayhang namulong.
“Sorry sa nahitabo kaganina, ha,” si Bongkoy ang miwakli sa kahilom nga nagpataliwala kanila.
“Ang hain niadto?” Nagpatuso-tuso si Rosalinda bisan nakasabot siya sa gisulti ni Bongkoy.
“Kadto gong nahitabo kaganina...sa sakyanan.”
“A, kadto? O-okey ra, uy.
“Basin bag nalain ka.”
“Wa, uy.”
Nangahilom na usab sila.
“May nakahasol ba sa imong hunahuna, Bongkoy?” Si Rosalinda na usab ang unang namulong human sa kahilom.
“Nga-nganong nakapangutana ka man og ingon niana?” Misumbalik pagpangutana si Bongkoy kaniya.
“Basta lang. Gusto lang kong masayod. Aduna ba?”
Nanghupaw si Bongkoy sa wala pa motubag.
“Aduna,” matud sa ulitawo.
“Unsa kana?” Pakitubod sa dalaga.
“Ayaw na lang pagpakisayod. Basin unya’g lakip ka maapektohan niini.” --Sumpayan pa