Lovers in Pari-an

Human sa daklit nga panagsultihanay, mibiya na si Bongkoy sa atubangan ni Rosalinda. Milahos na usab si Rosalinda pagsulod sa lawak ni Atty. Gumera aron isilbi ang dalang pagkaon ngadto sa abogado.

Samtang nagkaon, namatikdan ni Rosalinda nga maluyahon ang linihokan sa iyang agalon.

“Maayo tingali nga magpahiling ka’g doktor, Atorni,” nagkanayon si Rosalinda.

“Gisugo bitaw nako si Bongkoy pagsungko sa akong private physician,” tubag ni Atty. Gumera. “Gusto kong anhi lang sa balay magpahiling niya.”

Sa alas nuybe ang takna sa kabuntagon, nahiabot ang pribadong doktor ni Atty. Gumera. Gihiling dayon niini ang abogado. Ordinaryong trangkaso lang diay ang gimolo ni Atty. Gumera. Giresitahan kini’g tambal sa doktor.

Nianang pagkagabii, wala modungan si Bongkoy sa pagpangaon nila ni Rosalinda ug Tasing. Nagpaulahi kini. Ug pagkahuman niini’g kaon, mibalik dayon kini ngadto sa garahe. Wala magkaduol ni magkasulti sila si Rosalinda.

Misulod na usab sila si Rosalinda ug Tasing sa tagsatagsa nila ka lawak sa dihang nahuman na sila sa tanan nilang mga bulohaton sa kusina. -- Sumpayan pa