Gula 31
Nanghinaot si Rosalinda sa hilom nga dili tinuod ang pangagpas ni Tasing nga nahigugma si Bongkoy kaniya. Dili siya buot nga masakitan ang ulitawo. Dili mahimong dawaton niya ang gugma niini tungod kay dili siya makahimo sa pagtuis sa gikasabotan nila ni Daniel. Siya ang matang sa babaye nga dili daghan og nawong. Stick to one siya, matud pa.
Unya, usa ka adlaw niana wala motambong si Atty. Pomposo Gumera sa iyang law office. May gipamati sa lawas ang abogado. Wala gani kini motambong sa kumidor nianang pagkabuntag.
Gihatdan ni Rosalinda og pagkaon si Atty. Gumera didto sa iyang lawak. Samtang nagdangadanga na si Rosalinda sa pultahan, nakita niya si Bongkoy nga mao gyu’y paggawas gikan sa lawak sa abogado. Ingon gani sa nakalitan si Bongkoy pagkakita niini kaniya.
“Nag-unsa ka man sa lawak ni Atorni?” Gipangutana ni Rosalinda si Bongkoy.
“Gipatawag ko niya,” tubag ni Bongkoy. “May gisugo siya nako.”
“Diay ba?”
“Mao kana.” -- Sumpayan pa