Gula 27
Karon nga iyang nasuta nga nakagusto siya kang Rev, mas mainampingon na siya. Ang iyang kasinatian sa nabawo niyang gugma ngadto kang Alex naghatag kaniya’g leksiyon. Giisip niya kadto nga usa ka dakong kapakyasan. Mao nga karon, wala siya mag-expect og bisan unsa gikan kang Rev.
Dili siya gustong molaom sa wala. Dili siya buot magpaabot sa dili moabot. Mao nga gipaningkamotan niya ang pagluom sa iyang gibati ngadto kang Rev. Maulaw siya kun makasabot ang ulitawo nga may gitago siyang pagbati ngadto niini.
Gitingob niya ang iyang panahon sa pagsulat og mga nobela nga himuong pocketbooks. Si Rev ang hilom niyang gihimong inspirasyon sa iyang pagpanulat. Produktibo kaayo ang iyang pagka-nobelista.
Adlaw’ng Lunes. Sayong nangandam si Lonia sa iyang kaugalingon. Karong adlawa ang iyang gisaad kang Rev nga i-submit na niya ang duha ka nobela nga iya nang nahuman pagsulat.
Human sa pamahaw, mibiya dayon si Lonia sa iyang gipuy-an paingon sa buhatan sa UCV Romances.
Sanglit nailhan na man siya sa mga kawani sa maong kompaniya, lakip ang guwardiya, wala na siya kuti-kutiha kun unsay iyang transaksiyon sa nahisgotang buhatan. Midiretso siya sa opisina ni Rev Florentino.
Apan napahunong si Lonia sa iyang paghitangka sa pultahan. Iyang nakita nga may bisita si Rev nga usa ka babaye. Nagsultihanay ang duha nga iyang naabtan. -- Sumpayan pa