Gula 30
Wala makatingog si Rosalinda. Miduko siya. Iyang gihunahuna ang gisulti ni Tasing.
“Basta para nako, Day,” gikan ni Tasing. “Posibleng nakagusto nimo kana si Bongkoy. Ug pareson ra ba sab mo.”
“Saba diha, Nang, uy. Di na kana mahimo.”
“Ug nganong di man? Ulitawo siya ug dalaga ka?”
“Mao lagi. Pero may hinigugma na ko. Ug nasayod na si Bongkoy niana.”
Nianang pagkaudto, samtang mipahulay si Rosalinda sulod sa iyang lawak sa servant’s quarter, si Bongkoy ang diha sa iyang hunahuna. Wala pa gayod mapapas ang gibati niyang kahibulong sa katingad-ang lihok nga gipakita niini kaniya kaganina.
Unya nahinumdom siya sa gisulti ni Tasing.
Basin ba’g naigo sa pana ni Kupido ang kasingkasing ni Bongkoy sa paghigugma kanimo?
Husto kaha si Tasing? May posibilidad kaha nga tinuod ang pangagpas niini?
Gaan ang iyang kabubut-on ngadto ni Bongkoy. Alang kaniya, dili kini lisod higugmaon. Buotan man gud kini. Kugihan pa gyud. Pero kun mangulitawo man ugaling kini kaniya, nakaseguro na siyang iya gayod kining pakyason. May hinigugma na siya, si Daniel. Lig-on ang takgos sa pagsinaaray nila ni Daniel. Managsama silang nahigugma sa usa’g-usa. Nasayod siyang nagpaabot si Daniel sa iyang pagbalik aron magminyo na sila. -- Sumpayan pa