Ang kaipon

Ayo! May nagsangpit sa tugkaran sa balay diin nag-ipon sila si Merly ug Dante. Bag-o lang silang nahuma'g pamahaw. Domingo ron. Nanglingkod sila sa sala samtang nagtan-aw og telebisyon. "Tan-awa ra'g kinsa nang nagsangpit?"ni Dante. Nitindog si Merly ug nitambo sa bintana. Naniga iyang mata. Si Rudy ang nagbarog sa tugkaran. Iyang bana.

"Puede ko makig-istorya nimo. Di na ko mangitag gubot. Duna lang koy ihangyo," ni Rudy.

Masulob-on ug minghoy iyang nawong. Nilingi si Merly ngadtong Dante.

"Si Rudy ang nia, Dan. Gusto kuno makig-istorya nako," ni Merly. Nangluspad.

"Padayona! Mosulod lang ko's lawak nato,"ni Dante.

Sobra napulo ka tuig nang nagpuyo si Merly ug Dante. May duha ka anak dalagita. Di sila makasal kay minyo man si Merly ni Rudy. May tulo sila ka anak. Puro na ulitawo. Sila si Jerry, 21 anyos, si Roger 20; ug si Glen, 18 anyos.

Nibiya si Merly sa ilang panimalay sa Pagsabungan. Nikuyog ni Dante ug nakig-ipon sa iyang balay sa Canduman. Biyudo na si Dante. 

Apan sa wa pa nabiyudo si Dante, may relasyon na sila's Merly nga tinago. Way kalibutan si Rudy. Tungod kay naparalisa ang toong tiil ni Rudy, magsaguyod iyang linaktan. Sukad nasakit si Rudy, nagkakita sila si Dante nga kanhi hinigugma ni Merly sa hayiskul. Nabuhi ilang gugma.

"Unsa may imong tuyo?' ni Merly dihang nakalingkod na sa sopa si Rudy. Nilingkod si Merly sa lingkuranan atbang sa sopa.

"Si Glen napriso. Kay nakadisgrasya. Di siya ikiha kun makabayad siya sa nadasmagan niya. Nagkinahanglan ko'g kuwarta," ni Rudy. Di mahimutang sa iyang gilingkuran.

"Wa gyud diay kay tinigum?'' ni Merly.

"Sayod bitaw ka nga naa koy gimintin tambal. Pila ra man akong pension sa pagretiro nako sa gobyerno? Usahay ang tseke mabaligya na man gani," ni Rudy. Niping-it.

"Si Jerry ug Roger. Di ba naghabal-habal drayber man sila? Wa silay ikatabang?'' ni Merly.

"Wa sab lagi. Puro naman pamilyado. Si Glenn nangaplay og para abroad. Kay nakahuman mag Vocational Course, welder. Naghulat na lang sa tawag sa giaplayan. Kun makasuhan siya'g criminal, di na siya kaabroad. Siya lay pag-asa nako nga makatabang-tabang. Unsaong nagalgal man sab lagi sa barkada. Nidrayeb og motorsiklo sa higala bisag hubog. Wa pa gyu'y lisensiya. Nakatulog nga nagmaneho," ni Rudy. Minghoy ang nawong.

"Pila may gikinahanglan nimo?" ni Merly.

"Bayente mil pesos", ni Rudy. "Naa koy tinigum. Singko mil ra gyud," ni Merly.

"Kun kana ray imong maabut, dawaton nako. Manongko na lang ko's akong mga paryente," ni Rudy.

"Huwat sa kadiyot", ni Merly. Nitindog ug nisulod sa ilang lawak ni Dante.

Pag-abot ni Merly sa sulod, gitunolan siyang Dante ug usa ka bandol papel de banko.

"Unsa man ni?'' ni Merly.

"Mao nay ihatag ni Rudy. Bayente mil na," ni Dante.

"Kadako gud ani?'' ni Merly. Nangunot ang agtang.

"Maayo mang lakaw sa atong negosyo. Pahuwamon ta lang. Sayang si Glen. Basig ugma damlag makatabang sab unya na nimo. Gawas pa, gimahal sab nako imong mga anak ni Rudy. Kay tipik sab sila nimo. Mismo si Rudy. Nalooy sab ko niya. Labi na ining iyang pag-anhi karon. Nga dili na gubot iyang tuyo," ni Dante. Nanglab-ok sa laway. Nanghupaw si Merly.

"Sa ato pa, nibati ka sab sa akong laing pamilya?" ni Merly.

"Natural Merl. Ang imong mga minahal, gimahal ko usab. Bisag kaniadto, nagkauyab ta, di man kitay nagkadayon. Unya nadisgrasya sa traysikol akong kapikas, nahatagag ikaduhang higayon atong gugma. Giilog tika gikan ni Rudy. Nakasala ko ni Rudy. Higayon na nga makahatag ta'g bugti sa atong pagluib," ni Dante.

"Segurado ka nga gusto ni nimong buhaton?" ni Merly.

"Final answer. Sure na," ni Dante. Nagpahiyom. Nakapahiyom si Merly. Nitulong luha. Gigakos niya ang kaipon.

"Salamat sa imong pagsabot", ni Merly.

"Kadako ba ini! Abi nako'g singko mil lang," ni Rudy.

"Gitampohan ni Dante," ni Merly.

"Salamat kaayo ninyo" nitulong luha ni Rudy. Gilamano si Merly. Kagaksonon.

Lawom ang mga gininhawa ni Merly ug Dante nga nagsud-ong kang Rudy nga nag-angkihod nga nagpara'g traysikol sa daplin sa karsada di layo sa ilang nataran. (Kataposan)