Dihang gitukoran og usa ka dakong planta sa semento ang sityo Lukay-Lukay daghang mga lumolupyo ang wala makauyon kay lagi matud pa nila makadaot sa panglawas sa mga tawo ug labaw sa tanan sa mga bata.
Duna say moingon nga nakatabang usab kuno sa mga lumolupyo ang bag-ong planta nga karon nagdahunog sa iyang mga makina. Daghan usab ang nakasulod og trabaho niining plantaha.
Pero, alang sa taga sityo Lukay-lukay mag-unsa man kuno ang trabaho kun ang ilang mga baga maapektohan sa abog sa semento.
Si Cleto nga bag-ong minyo ug wala pay anak mipahungaw sa iyang kalagot pinaagi sa paghimo og usa ka petisyon diin papirmahan niya sa mga lumolupyo dinhi sa sityo ug ingon man sa mga lumolupyo sa ilang baryo nga nahasol sa abog sa semento nga ibugwak sa panghaw sa dakong planta panahon sa gabii.
Tungod niini kay medyo pipila ra man ang miabin kang Cleto dunay usa ka hilumong tawo nga nagpuyo sa may nabungtod nga bahin sa sityo Lukay-Lukay ug kini mao si Horacio.
Miadto siya sa balay ni Cleto nianang pagka-sayong gabii ug miingon kini kang Cleto, “Bay Cleto, kitang duha ang mokumbati niining nahitabo sa atong sityo...kay kun pasagdan lang kini nato, ang mahitabo mao nga mangadaut ang panglawas sa atong mga kaigsuonan dinhi sa atong sityo ug ingon man sa balangay nga naapektuhan sa abog...” Namuwa ang mga mata ni Horacio nga namulong.
“Masgilbi kaha kining atong pagabuhaton, Bay Horacio, nga datu man ang maong kompaniya?” Mora’g nagduda si Cleto sa ilang tumong.
“Aw, kun kanay atong hunahunaon, mutalaw gyud ta, pero kun ang kaugmaon sa mga lumolupyo dinhi, wa tay kahadlokan, bisag nagbaha pa kanang kuwarta sa kompaniya,” matud ni Horacio.
Unya, may gipamulong si Horacio ngadtong Cleto, iyang gihunghong. Miyangoyango si Cleto. Nianang pagka-gabii, wala makatulog si Cleto sa gisulti ni Horacio.
Ambot kun komedya o tininuod ba ang gisulti niini, kay matud pa niini, iya kunong balbalon ang manedyer ug ang tag-iya sa planta.
Ang tabitabi bahin kanila nga mamalbalay og tawo usa ka dakong tinuod. Gibati na hinuon og kahadlok si Cleto.
Unya nianang pagkabuntag nagubot ang tibuok lungsod sa balita nga si Mr. Tan, ang manedyer sa planta sa semento giatngan kuno sa may tulay ug unya gibalbal kini sulod sa iyang kotse. Ug tungod niini, gipulihan kini’g bag-ong manedyer ug mao lang gihapon ang nahitabo kay gibalbal kini.
Unya, paglabay sa unom ka bulan may tulo ka tawo nga nangita kang Horacio ug didto kini mopaingon sa ka Cleto. Luspad ang nawong ni Cleto nga mitudlo sa balay ni Horacio sa may bungtod. Tuod, nanglakaw dayon ang tulo ka mga tawo nga mora’g mga armado.
Pagkasunod adlaw mao na lay nadunggan ni Cleto nga gisunog ang balay ni Horacio ug matud pa naapil kuno si Horacio. Apan, dunay nakakita kang Horacio didto sa silingang lungsod nga nitrabaho sa usa ka construction. Ug dunay miingon nga si Horacio namugno didto sa ilang trabahoan. (Kataposan)