'Magpalansang ko, Padre'

Ang kabugnaw sa aircon sa sulod sa lawak daw miokiok sa kalawasan ni Padre Gally Leo Sandoval human sa paghubo niya sa iyang sotana.

Gibati niya ang hilabihang kabugnaw nga maoy mihulip sa hilabihang kaalindanga nga iyang gibati kaganiha atol sa iyang pagdumala sa misa sa ilang parokya nga gitambongan sa bagang duot nga katawhan sa ilang dapit sa barangay Hilantawon.

Gihubo niya ang t-shirt nga gisul-ob ug gitrapohan sa tualya ang nagkadusingot niyang kalawasan ug milingkod sa silyang tuwang-tuwang sa pagpahulay sa iyang kaugalingon.

Gitan-aw ni Padre Gally Leo iyang relo de pulso ug nagtug-an nga alas 3:30 na ang takna sa hapon ug katloan na lamang ka gutlo ang paaboton alang sa pagsugod sa prosesyon nga magsugod untop alas 4 ang takna sa kahaponon.

Gikan pa sa iyang pagdumala sa misa si Padre Gally Leo. Ug gipaningot siya atol sa iyang paghatag og wali. Ang nagdasok nga mga tawo nga nanimba sa Biyernes Santo ug ang naglagiting nga kainit sa adlaw maoy nakaingon sa hilabihang kaalimuot sa sulod sa simbahan.

“Si Ginoong Hesukristo gilansang sa krus dili tungod sa iyang nabuhat nga mga sala,” nagkanayon si Padre Gally Leo sa iyang wali kaganiha. “Gilansang siya tungod kanato nga masinupakon ug naglunang sa kasal-anan!”

“Ug kun nagpalansang si Hesukristo ug nagpakamatay diha nianang Krus tungod kanatong mga makasasala,” dugang pa ni Padre Gally Leo.   “Angay usab unta nga kitang mga tawo nga iyang giluwas maghinulsol sa atong kasal-anan ug magpalansang sa atong kaugalingon pinaagi sa pagbiya sa pagbuhat og mga sala ug magpakabuhi subay sa iyang kabubut-on!”

“T-tokkk!!!” t-tokkk!!!,   t-tokk!!”

Nabati niya ang toktok sa pultahan nga maoy nakaaghat kang Padre Gally Leo sa pagbarog gikan sa iyang gilingkoran ug gibalik pagsul-ob ang gihubo niyang t-shirt.

Nagdali siya sa pagpaingon sa pultahan ug giablihan sa pagsuta kun kinsa ang nanoktok.

“P-pads,”ni Pet pa nga iyang sakristan nga mao diay ang nanuktok sa pultahan. “Naay seksirekang babaye nga nangita nimo.”                                                          

“K-kinsa?” pangutana ni Padre Gally Leo.

“S—si Medalla de Luna ang tag-iya sa asinda De Luna,” ni Pet pa. “Imo kuno siyang kaila ug buot siyang makigkita kanimo, P-pads.”

“M-mao ba,” ni Padre Gally Leo pa nga daw gibati og kahingangha ug migawas alang sa pagtagbo sa nagpaabot nga bisita nga naila na sa ilang dapit nga mata pobre ug madaugdaugon sa iyang mga saop.

“M-maayong hapon, Padre,” sa bisita pa nga mikab-ot sa kamot sa pari sa pag-amen niini.

“M-maayong hapon sad,” sa pari pa nga mapahiyomon nga mitimbaya niini.

“M-magpalansang ko Padre,” ni Medalla pa. “A-ang imong wali kaganiha maoy nakaabli sa akong hunahuna sa paghinulsol sa akong mga sala ug pagsubay na sa kabubut-on sa Ginoo nga sulod sa dugay kaayong panahon akong nataligam-an. “S-salamat Padre!”

Human sa pipila ka gutlo nilang panagkukabildo sa iyang bisita nananghid na kining mopauli.

Gisundan sa pagtan-aw sa pari ang iyang bisita nga naglakaw ug nakita niya ang tul-id nga dalan niining gisubay. (Katapusan)