Idlas ang katumanan sa gugma

Gula 23

“Salamat sa imong mga pahimangno, Rev.

Dihang nagkatagbo ang tinan-awan nila ni Rev, si Lonia ang unang milingiw. Dili siya makaharong sa tinutokan ni Rev. Kulbaan siya sa higayon nga magkabag-iray ang ilang mga panan-aw.

Nianang pagkagabii wala dayon makatulog si Lonia. Nag-alindasay siya sulod sa iyang lawak. Naghayang siyang naghigda sa mahunolhunol nga kama apan nagpitawpitaw ang iyang mga mata nga nagtutok sa kisame. Ang iyang lawak gidan-agan lang sa kuwap nga kahayag sa lampshade.

Maoy iyang gihunahuna si Rev. Ang wala niya damhang pagbisita ni Rev kaniya kaganina ingon sa usa ka dakong butang nga nahitabo sa iyang kinabuhi. Nabatyagan niya nga gaan kaayo ang iyang buot ngadto kang Rev.

Namatikdan niya nga buotan ug masinabuton si Rev. Iya kining natugkad sa sinultihan niini. Iyang nadiskubrehan nga may kinaiya diay si Rev nga wala niya makita niadtong mga higayon nga nagkasulti sila sa buhatan niini sa UCV Romances nga karon iya nang nasayran.

Sa opisina, si Rev may pagka-authoritative and demanding. Katahaan. Apan lahi diay si Rev kun anha sa gawas sa opisina niini. Usa kini ka yanong tawo, game kaayong ikasulti ug makalingaw. Labaw sa tanan, mipatigbabaw ang kinaiya niini sa pagka responsable ug may prinsipyo. -- Sumpayan pa