Nabughat bisan wa mangalsa

Good luck nalang Ulang, unsay resulta nga nahuman na gayod ang inyong kasal ni Pasyo!" ni Nanay pa niya Porlang nga gipikpik ang abaga sa iyang anak nga dalagang guwang nga naminyo kang Pasyo nga makatulo na mabiyudo.

"Salamat kaayo Nay Porlang ug inig-kaugma ikaw gayod ang una kong pakigsultihan unsay resulta sa unang gabii sa among kasal ni Pasyo!" mihun-ag ang kamapahiyumon sa nawong ni Ulang.

"Hinuon Ulang, bisan tuod taudtaod na ako nga nabiyuda ni anhing Tatay nimo Tibo, mabalak-on gihapon ako nga naghunahuna nga sa kaniwang ni Pasyo, basin makuyapan kini kun imong madat-ogan sa kadako sa imong lawas!" dihay pasiuna nga gihagawhaw ni Nanay niya Porlang.

Kining tanan nga gipamulong sa inahan ni Ulang, wa kini malilong ni Pasyo. Magpasalipod man god siya sa haligi, samtang mag-estoryahanay silang duha bahin sa iyang kaniwang og lawas.

"Hinumdomi kini kanunay Ulang, nga ang karambola natong duwa human sa atong kasal, dili kini pasakitay kundili pagilokay!" gidaygan siya sa tanan ni Pasyo. Gisaog man god ang iyang hunahuna, sa tumang kahadlok ... basin tuod nga sa kadako niya og lawas, iyang madat-ugan ang iyang bana ug mamatay.

"Mao ba Syo? Sa ako god ron nga pagka-dalagang guwang ... una pa man kining higayon nga ako makatilaw og binuakay sa pakwan!" ni Ulang pa nga matinud-anon nga namulong.

Igo pa lang gani nga nakasulod si Ulang, aron mohigda sa may dakong lantay, sulod sa may sibay, gipangulbaan na siya nga nagsud-ong sa lawas ni Pasyo nga naghubo diin sa iyang tan-aw pulos na lang bukog nga mitapot sa panit sa kaniwang sa iyang bana.

Ambot unsang pagkaunsaa... nga ingon man sa gilamat si Ulang, sa iyang nahikapan nga sobra man kagahi nga maoy nakapakuyap kaniya.

Misilang na ang adlaw sa iyang pagmata. Dili na siya makabangon sa iyang gihigdaan nga lantay. Way hunong pag-uylap sa kahapdos ang ubos sa iyang bilahan.

"Unsay nahitabo kanimo anak? Lupig pa man ka sa napus-an?" ni Nanay pa niya Porlang nga nabalaka.

"Mao ra man ako og nabughat Nay Porlang, nga wa man unta ako mangalsa og bug-at?" ni Ulang pa nga lugos mabuka ang mata.

Igo lang siya gipahiyoman sa iyang inahan nga biyuda, nga nagpanglingo-lingo. (Kataposan)