Ting-Tong-Tang! Klang! Tak! Tik! Mitagingting ang mga sinsiyo ngadto sa inidoro gikan sa lubot ni Doro. Nalibang siya'g kwarta. Dugay nang gidamgo ni Doro nga malibang siya'g kwarta, karon ania na gayud miabot na. Milakra sa iyang nawong ang natingalang pahiyom samtang nagsud-ong sa inidoro nga hapit na mapuno sa sinsiyo nga iyang gikalibang.
Nangandoy siya niining usa ka "Believe it or not" kon atong Binisay-on "Katuhoan dili, apan tuo nalang aron ta madali", tungod kay siya way hibangkaagan. Ilo na siya sa mga ginikanan, tungod kay namatay sa sakit sa mga kabos, kasagarang sud-an buwad ug ginamos, way tarong nga mga bitamina ug mineralis.
Wa siya’y mga igsoon. Siya ray nakaya paghimo sa iyang Mama'g Papa kay kuwang lagi sa enerhiya sa kombate sa kama. Na! Wa man gani kuno sila’y kama, sa sawog ra man gani kunong kawayan siya sa ilang payag siya buhata, nangasalugsog gani kuno ang mga lubot sa iyang Mama'g Papa sa pagbuhat kaniya.
Wala sad siya’y asawa. Wala’y misugot sa mga babaye, kadalagahan sa ilang Bario Matisok nga iyang gipanguyaban. Kay lagi kuno, unsaon man iyang nawong naliwat man sa salugsogong kawayan diin siya buhata sa iyang Mama'g Papa. Nalihian kuno hinuon siya, Pastilan! Haskang Paita!
Kung di pa lang kuno sakit ang paghikog, dugay na niyang gituok iyang liog. Giilisan na lang kini niya sa paghubog-hubog. Bisan asang dapita nga naay inom way pesta o naay pesta, naay okasyon o wala, basta maabot lang ug maantos niya ang mga batuong dalan sa iyang lapa-lapa, iya gyud kining adtuon, aron muinom sa ilimnong makahubog. Wa siya’y atrasan, mapa-Vino Kulafu, di siya mahadlok sa pana, Tanduay, di siya mahadlok ug panuway. Kay giminingan man gud ni sa mga palahubog ang Tanduay, ug T-anan, A-naa, N-iana, D-emonyo, U-g, A-ng, Y-awa. Moinom sab bitaw kuno siya’g San Miguel Beer, naa nay manalipod niya sa Yawa. Moinom pod siya’g Red Horse, di siya mahadlok hiyataka’g kabayo. Moinom siya bisag unsa, gin, vodka, lambanog, tuba, dawat, bahal ug bahalina. Bahala na ni iya. Puslan mang way nagmahal!
Mao ra gyu’y iyang mahinumdoman sa dili pa siya makatug gumikan sa kahubog diha man sa walog o sa hamugaway’ng dalan, kanunay gyud niya makit-an ang "When you wish upon a star" nga mahulog sa kalangitan. Dili pod niya hikalimtan ang pag-ingon dayon "Maytag malibang ko'g kwarta uy! aron di na ko maingon niini sugton dayon ko sa mga babaye nga gwapa ug seksi."
Karon natinuod na iyang gipangandoy. Misiga iyang mga mata samtang mikatawa ang iyang baba, nagkuba-kuba ang iyang dughan. Nagkurog-kurog ang iyang mga kamot sa tumang kalipay nga nakakita sa inidoro nga napuno na sa kwarta nga iyang gikalibang. Iya dayon kining gihakop sa hinangol nga paghakop. Apan sa kalit lang nangatunaw kini. Pwerte niyang guola. Mihilak siya ug mihilak pa gyud og maayo dihang nakamata siya sa kamatuoran nga naglunang na siya sa kaugalingon niyang hugaw.
Ang "Wish upon a star" wa matinuod kay aninipot lang diay kadtong iyang nakita kay iyang ulo napantok dihang nasarasay gumikan sa kahubog. (Kataposan)