Lovers in Pari-an

Gula 20

Apan wala siya makatulog. Nagpitokpitok lang ang iyang mga mata nga mitutok sa kisame. Wala niya kapugngi ang paghandom sa ilang probinsiya diin atua ang namingawan niyang mga ginikanan ug igsuon.

Gimingaw siya sa iyang mga mahal sa kinabuhi. Una kining higayon nga nahilayo siya sa iyang mga ginikanan ug igsuon. Kun dili pa lang tungod sa kawad-on, dili gayod unta siya mobiya sa ilang dapit. Gusto niyang ikauban sa kanunay ang iyang mga ginikanan ug igsuon.

Unya, takulahaw lang misantop sa iyang hunahuna si Daniel, ang iyang hinigugma nga nahibilin didto sa ilang dapit. Kumosta na kaha si Daniel karon? Naghandom kaha usab si Daniel kaniya niining mga gutloa? Nakasukot siya sa iyang kaugalingon niining maong mga pangutana.

Gibati usab niya ang tumang kamingaw kang Daniel. Una usab kining higayon nga nagkalagyo sila.

Hapit na unta mahikatulog si Rosalinda sa dihang milanog sa kalikopan ang tugtog sa usa ka sista. Gisundan kini sa pag-awit sa usa ka lalaki nga mikanta sa “Somewhere Down The Road” nga gipasikat ni Barry Manillow. -- Sumpayan pa