Gula 15
Pagkasunod adlaw, nakadawat si Lonia og text gikan sa numero nga wala marehistro sa phonebook sa iyang cellphone. Iya kining gibasa aron masayran kun kinsa ug unsa ang tuyo sa nag-text kaniya.
Gikan diay kang Rev Florentino ang text. Wala na siya mahibulong kun nganong nasayod si Rev sa iyang cellphone number tungod kay iya kining gilakip pagbutang didto sa gi-submit niyang resume uban sa iyang storyline.
Good news alang kaniya ang text ni Rev. Gipahibalo siya niini nga mahimo na niyang sulaton ang iyang nobela tungod kay naaprobahan na niini ang iyang storyline. Nalipay pag-ayo si Lonia.
Gisudan dayon niya pagsulat ang iyang nobela nga nag-ulohan og “Gugmang Nakawang.” Ang dugokan sa maong nobela may repleksiyon sa matuod niyang kasinatian sa kinabuhi ug gugma. Gusto niyang ipahungaw pinaagi sa pagsulat ang iyang kahimangod sa kalibotan gumikan sa masakit niyang kasinatian sa gugma.
Apan gipaningkamotan niyang dili makalapas sa mga lagda sa pagsulat og fiction ang pag-ugmad niya sa iyang nobela. Iyang gipaningkamotan nga mopatigbabaw gayod ang pagka-fictional sa nobela ug dili molutaw ang personal niyang pagbati sa pagsulat sa maong nobela. -- Sumpayan pa