Idlas ang katumanan sa gugma

Gula 13

“Dili ko enjoy sa maong trabaho,” laktod niyang tubag.

Gusto niyang matapos na ang pagdukiduki ni Rev mahitungod sa maong isyu. Dili niya ikatug-an ngadto niini ang matuod nga hinungdan kun nganong miundang siya pagpraktis sa iyang propesyon. Dili na usab siya gustong hisgotan pa kini aron mahikalimot na siya sa masakit niyang kasinatian.

Mibalik pagtamod si Rev sa iyang storyline.

“Basahon ko pa kini,” nagkanayon ang editor. “Kun unsa gani resulta, mo-text lang ko nimo. Okey?”

“O-okey,” mubo niyang tubag.

Gikan sa buhatan sa UCV Romances, naglaroylaroy una si Lonia sa downtown. Nasayod siyang bation lang niya ang kalaay kun mopauli siya’g sayo ngadto sa iyang gipuy-an sa Tisa. Nag-inusara na lang siya pagpuyo sa ilang balay sukad namatay ang iyang mga ginikanan. Si Greta, ang iyang maguwang, may kaugalingon nang pamilya ug atua na magpuyo sa Guadalupe.

Misulod siya sa Gaisano Main. Midiretso siya ngadto sa school and office supplies department diin makaplagan usab ang nagkadaiyang mga libro nga gibaligya. Maoy iyang gipangita ang mga libro bahin sa fiction.

Kasamtangan siyang nagbasa sa synopsis sa romance novel nga sinulat ni Danielle Steele sa dihang mibagting ang iyang cellphone. Iya kining gidali pagkuha gikan sa iyang shoulder bag aron pagsusi kun kinsay nanawag. -- Sumpayan pa