Giti sa Kagang.... ingon ka ba diay gihapon niana, Fredo?" singgaak ni Tatay nga nakapasalibay sa lipstick nga akong gihidhid sa akong mga ngabil gumikan sa labihang kahikurat. "Di ba giingnan ko na man ikaw nga hunonga na kanang imong mga tinunto kun buot ka nga ilhon ko ikaw'ng anak?"
"Unsaon man lagi, Tay, uy, nga inyo man kong gibuhat nga ingon niini!" dali kong tubag sa mainggit apan pinaluray nga tingog.
"Uy, Fredo, lake kang dako! Busa paglinake! Huboan kanang bestida ug maoy isul-ob ang polo shirt ug karsones nga akong gipamalit para nimo! Patupi usab og linake!"
"Sus, da, uyyyy!!! Si Tatay bayaaaa!!! Pasagdi lang 'god ko, Tay, uyyy!!!" nako pang misugod na paghilak.
"Unsay pasagdi? Kun di ka patuo, hala, layassss!!!"
Dinhi namutos ko ug milakaw nga way tumong. Ubay-ubay ang kuwarta nga akong nabalon nga akong tinigom gikan sa pagmanekyur, pagpedikyor ug paghindik sa mga kaslonon.
Didto ako mahisay-a sa dakbayan sa Sugbo. Pait intawon kaayo ang akong pagkabutang. Mokaon sa pungko-pungko ug mohigda sa aseras. Adlaw'ng tanan nagdaphag pagpangitag trabaho apan pakyas kay walay mga bakante. Sa dihang hapit na mahurot ang gitigyaman kong kuwarta misulod ko sa simbahan. Atubangan sa altar gipabaha ko ang akong mga luha.
"Dong, nganong naghilak ka?" tingog nga nakapugwat kanako nga dinunganan sa pagpikpik sa akong abaga. Sa akong paglingi nahimamat sa akong panan-aw ang usa ka Pari.
"Problema, Father," ug miluom ko paghilak. Unya, ako siyang giasoyan nga gipalayas ako sa akong amahan tungod kay wala ko mopatuo nga hunongon ang pagkabayot ug huptan ang mga hiyas sa tinuod nga lalake.
"Uy, Dong, ang atong amahan maoy atong manggigiya sa lakat sa kinabuhi," nagkanayon ang Pari. "Iyang katungod ang pagsumpo sa mga sayop nga atong mahimo. Husto ang iyang tambag nga pabiyaon ka sa imong pagkabayot. Hala, ngari sa kumbento kay mangaon ta. Sa pagkatapos palitan tikag mga sapot nga linake ug patupihan. Pauli nga magsul-ob nag polo ug karsones ug lalake na ang hinapay. Pangayo’g pasaylo sa imong mga ginikanan, ilabi na sa imong amahan nga dakong supak sa imong pagkabayot."
Ang mga pulong sa Pari daw yamog nga misuhop sa akong kasingkasing. Sa diha na ang polo ug karsones naghubo ko ug ako kining gisul-ob dayon miadto sa barberohan aron magpatupi. Unya, maya kong mipauli human hukipi sa Pari og usa ka libo ka pesos.
"Maayoooo!!! Maayong hapooonnnn!!!" nangatahoran ko sa tingog nga di na pinaluray sa akong paghimuntog sa hagdanan sa among panimalay.
Wala madugay migula si Nanay. Nahinulong kini pagtutok kanako.
"K-kinsa ka man, Dong? Ug, unsa may imong tuyo?" ni Nanay pang mikipat ang mga mata.
"Nay, wa na ka makaila nako? Ako si Fred, Nay, nga imong anak!"
"Uy, Fred, i-ikaw diay?" ug mikiros si Nanay paggakos nako. "Sus, kadugay nang wa na ta magkita!"
"Kinsa 'na siya, Andang?" tingog nga nagagikan sa akong luyo. Sa akong paglingi nakita ko si Tatay nga nagtutok kanako.
"Pa, ako si Fred," nako pang mibulag paggakos ni Nanay ug mitapon paghalog sa akong amahan. "Pasayloa ko, Pa, nga wa dayon mopatuo sa imong mga tambag." (Kataposan)