Gula 9
Samtang nagsakay si Rosalinda sa dyip, wala lang tuyoa nga nakapangutana siya sa iyang kaugalingon kun unsa kahay kapalaran nga nagpaabot kaniya sa siyudad.
Mikanaog si Rosalinda atubangan sa Gaisano Main. Milingilingi siya. Nakasukot siya sa iyang kaugalingon kun unsay sunod niyang buhaton. Asa man siya paingon karon?
Misubay siya sa aseras. Nasuta niya kun unsa kadasok ang katawhan nga maghugop sa Colon. Naghuot ang aseras sa kadaghan sa tawo. Pun-an pa sa mga manindahay nga naghamyang sa ilang mga produkto sa daplin, misamot ang kaapiki sa agianan sa aseras.
Mipadayon si Rosalinda paglakaw. Matag karon ug unya, mopasiklap siya sa mga dapit nga iyang nalabyan. Iyang gibasa ang mga pahibalo nga gipapilit sa haligi, pultahan ug bungbong sa edipesyo nga iyang naagian. Namasin siya nga makagiya kini kaniya aron makakita dayon og trabaho.
Wala madugay sa iyang paglakaw, nahitukmaan niya ang usa ka outlet sa Julies Bakeshop. Mipalit siya og pan kay mihilab ang iyang tiyan sa kagutom. Giparesan niya kini og softdrink. -- Sumpayan pa