Lovers in Pari-an

 Gula 2

Pag-abot niya sa umahan nakita dayon niya ang iyang Tatay nga nagpadayon sa pagdaro. Gipahimutang ni Rosalinda ang dala niyang basket nga gisudlan sa mga pagkaon duol sa punoan sa tugas. Unya gitawag niya ang iyang amahan nga wala gyud makamatikod sa iyang pag-abot.

“Tay....!”

Milingi ang iyang amahan ngadto sa iyang nahimutangan.

“Mamahaw na, Tay.”

Dihadiha mihunong pagdaro ang iyang amahan. Gitangtangan niini sa yugo ang kabaw ug gipasibsib ang mananap sa daplin sa daruhan. Pagkahuman, miduol na ang Tatay ni Rosalinda sa iyang nahimutangan. Ug nangaon sila.

“May ihangyo unta ko nimo, Tay,” nagkanayon si Rosalinda dihang hapit na sila mahuman og pangaon.

“Unsa man kana, Anak?” Sukit sa amahan.

“Manarbaho unta ko sa siyudad, Tay.”

“U-unsa?”

“Mao kanay nakab-ot kong hukom, Tay. Gusto kong makatabang ninyo ni Nanay.”

Kahilom.

“Mosugot ka ba, Tay?” Misukna si Rosalinda pagkilab sa pipila ka daklit. -- Sumpayan pa