Diskarte sa hubog

Kun nagpabadlong inyong ginikanan, magpabadlong sab diay mo? Kahibawo man mo nga dautan ilang gibuhat, dili ninyo sun-on. Maningkamot mo sa katarong. Aron di mo ingnon nga kun unsa ang punuan, mao sab ang bunga!" maymay ni Freddy Rivas biktima sa dasmag og motorsiklo ngadto ni Edgar, ang nagmaneho nga hubog pa.

Nag-atbang karon ilang duha ka katre sulod sa Emergency Room sa Green Meadow Medical Center. Naghilak karon si Edgar nga dinhi na sa ospital nasayran ni Freddy ang ngalan. Kasamtangang gitambalan iyang mga pangos sa agtang, mga kilay ug mga aping. Gitambalan sab ang samad ug bun-og ni Freddy.

Hambugero ra ba gyud kaayo si Edgar kay siya ang nagpili nga anhi gyud sila dad-a sa ambulansiya ining pribadong ospital. Green Meadow Medical Center iyang gimandar sa drayber sa ambulansiya nga nidala nila sa ospital. Kay naa kuno siyay iyaan sa maong ospital. Sa pagkahitabo, nidayib si Edgar sa karsada.

Nagbuwag ang motorsiklo ug siya. Abi gani ni Freddy ug namatay si Edgar. Kay nipilit man ang nawong sa sementadong karsada. Unya morag nikirigkirig kadiyot. Nahapla ug nadakdak lang si Freddy pagkaigo.

Nabati niya nga naigo iyang tuong kilid dapit sa luyo sa manibela sa motorsiklo. Unya ang iyang tuong bagtak naigo sa foog. Nabun-og ug nasamad iyang bagtak. Naglisod siya'g tindog sa kasakit human gyud sa hitabo. Abi niyag nabali ang bukog sa iyang tuong batiis.

Maong wa lang una siya nilihok. Naghulat siya sa ambulansiya nga gitawag sa mga tawong nanapok human sa hitabo. Diha dasmagi si Freddy sa walang habig sa Don Suico Street, Pagsabungan, Mandaue. Pag-abot sa ambulansiya, nakamata si Edgar.

Ang gikalagotan ni Freddy kay namakak si Edgar sa nurse nga nagtambal niya. May mga pangos man siya sa agtang, mga kilay ug mga aping. Giingnan niya ang nurse nga nagpatunga kuno si Freddy. Iya kunong gibusinahan, wa gyud kuno mopadaplin. Maong nadasmagan niya.

Ang tinuod nag-hike si Freddy kay hilig siya'g hike. Mao ni ang matang sa pasingot iyang gipili. Kay duna siya'y dayabitis. Gawas sa tambal iyang gimintin, gitambagan siya sa doctor nga mag-amping sa pagkaon ug mag-hike. Kun mahimo kada adlaw gyud. Labing taas nga hike duha ka oras. Anha siya tigpanukad sa iyang balay giabangan sa Canduman. Naa sab diha iyang opisina kay usa man siya ka CPA. Diha siya maglakaw sa walang habig sa karsada. Unsa bang pagka-unsaa nga gidasmagan man gyud siya sa luyo? Hubog si Edgar nga nagmaneho sa motorsiklo. Nakatulog. Maong niliko siya sa wala nga wa nay kalibutan.

Pag-abot nila sa Emergency Room, gipangayoan niya'g lisensiya ug rehistro sa motorsiklo si Edgar. Way ikahatag. Wa siya'y lisensya. Way rehistro ang motorsiklo. Unya nasayran ni Freddy nga wa na diay sa ospital ang iyaan ni Edgar. Dugay nang niresayin.

"Pasayloa lang ko, Sir. Wa man nako tuyoa pagdasmag nimo", ni Edgar nga naghingoshingos.

"Kinsa man goy motoyo. Apan mora gihapog gituyo kay hubog kang nagdrayeb unya wa pa gyu'y lisensiya. Ang importante bayran lang nimo akong gasto sa doctor, ospital ug tambal," ni Freddy.

"Wa man ko'y ikabayad, Sir. Wa koy trabaho. Buwag akong mama'g papa. Si mama nikuyog sa laing lalaki. Sila na ron nagpuyo. Si papa naa say bag-ong asawa. Ipon sa among balay. Maldita kaayo. Maong naghuboghubog ko's kalagot," dugang ni Edgar.

"Tawga's telepono imong mama'g papa. Kay pulis akong tawgon human nimo. Hain lay makauna'g abut dinhi's ospital. Kun imong papa'g mama makauna unya mopirma sila sa Accounting Department sa ospital nga sila'y mobayad bisag pila unya ingog dako ikabayad nako sa akong kahasol, okay ko. Di tika ikiha. Di tika ipaarestar", ni Freddy.

Nakapangawot sa ulo si Edgar. Apan nidali'g naug sa katre aron moadto's telepono sa Nurses' Station.

Gipasakay og wheelchair si Freddy kay X-ray-han iyang batiis kun wa bay fracture. Nakahukom si Freddy nga kun dili mopirma sa bayranan ang ginikanan ni Edgar, siya na lay mopirma. Unya iya gyung pasakahan og kaso si Edgar nga driving without license and without helmet, a motorcycle without registration. Iya pang ipa-impound ang motorsiklo. Nahasol gyud hinoon siya ining disgrasyaha. (Kataposan)