Ang mangtas sa sityo Tabanog

Balig lima na ka tuig ang panag-ipon nila ni Beryong ug Sitang isip managtiayon apan ingon sa gihabolan gyud sa tumang kahaw-ang ang ilang panagluon sa salag sa kaminyoon.

Sukad sa ilang pagluon isip magtiayon namatikdan gyud nilang duha nga dunay kuwang ang ilang pagminahalay kay lagi wala man gyud intawon togahi bisa’g usa na lang ka buok anak. Walay deperensiya si Sitang sa iyang matris kay kaliwat nila nga manganakay gyud.

Ang iyang upat ka mga igsoon nga mga babaye duna nay mga anak ug ubay-ubay pa gyud kaayo, kay si Dolyang nga ilang kinamaguwangan dunay siyam, ang sunod nga si Sonya dunay napulo, si Berta nga ikatulo nagbaguod sa iyang onse ka buok ug ang ikaupat nga si Maria kaluoy sa Ginoo trese gyud ka buok.

Ug siya hinuon si Sitang nga maoy labing ingnon tang punga nga maanyag sa tanan niyang mga igsoon nga mga babaye wala gyu’y anak. Sa ngadtongadto nasayran ni Sitang nga si Beryong diay maoy dunay deperensiya.

Sa iyang pagpauli ni Beryong wala na siya’y itlog ug karon pa gyud mahibaw-i ni Sitang dihang nagluon na sila sa salag sa kaminyoon. Gani sa unang gabii nga ilang tagamtamon ang kalalim sa himaya nga lawasnon, gusto man ni Beryong nga walay suga. Apan sa kadugayan nahibaw-an ra gyud ni Sitang nga si Beryong gikuhaan na diay og duha ka butang nga maoy instrumento sa pagpanganak.

“Pasayloa ko, Tang, nga wala ko ikaw sultii nga ako wala nay kuan,” ni Beryong pa nga mora’g maulawon kaayo nga namulong.

“Okey man lang na nako, Ryong, apan gusto man gud ko nga duna tay anak. Mingaw kaayo ta, uy, labi nag matiguwang na ta, unsaon na man lang unya,” dihay lakra sa kasubo sa nawong ni Sitang.

Wala na motubag pa si Beryong. Nakasabot si Sitang nga naguol pud kini sa ilang sitwasyon. Hinuon, wala man sila magkalisudlisud kay duna may dakong darohan si Beryong ug kompleto sa mga tanom. Duna pud sila’y binuhing mga hayop sama sa baka, baboy, kanding, manok, kabaw, itik, gangsa ug uban pa.

Dinhi sa sityo Tabanog sila ang huwamanan og mga kuwarta sa ilang mga silingan. Unya, usa ka hapon may uha sa bata silang nabati. Sa ilang paglili sa pultahan, maoy ilang nakita ang usa ka puya.

Sangko sa langit ang pasalamat ni Sitang ug Beryong sa katapusan gihatagan ra gyud sila og matawag nga ilang anak.

Kay bukid ang sityo Tabanog gianhaan sila’g mga batan-ong gang ug gisugo sila nga patamnon og marijuana. Mibalibad si Beryong. Nasuko ang leader sa gang nga si Maximo. Pag-umangkon sa mayor sa ilang lungsod.

“Aw, kun dili ka motuman sa akong gisugo nimo, Beryong, ugma na lang kutob ang inyong mga kinabuhi dinhi,” siga kaayo ang mga mata sa adis-adis nga gang leader. Gihapuhap pa niini ang puan sa iyang kalibre .45 nga pistola. Tuod, pagka-gabii nakurat sila sa ilang nakita kang Sinto. Nagtuwad kini ug siga ang mga mata.

“Nag-unsa ka diha, Dong Sinto?” ni Beryong pa.

“Wala, wala man, Tay,” tubag niini dayong barog nga puwa kaayo ang mga aping ug mata. Dayon mibiya kini nga nanaog sa silong.

Pagka-ingon ugma sa gabii, diha na sila si Maximo ug pulos sila mga armado. Pito sila ka buok.

“Beryong, kanaog kay mao na kini ang adlaw sa paghukom nimo!” ni Maximo pa (leader sa gang). Apan ang nanaog mao si Sinto. Ug unya kalit lang nausab si Sinto ug gidasmagan ang mga armadong tawo. Gipaak-paak, gikuniskunis, gibalian sa ilang mga bukton, ug unya gihabwa niya ang ilang mga tinai. May usa ka wala maintimano ug misutoy pagdagan.

Dihay mga polis nga nanungas sa sityo Tabanog aron pagdakop kang Sinto apan wala na sila sa ilang payag. Nagkulismaot ang nawong sa mga polis nga nagtan-aw sa nakuniskunis nga mga lawas sa gikaintapang “Gang” sa lungsod. Wala na gyud mopatim-aw sila si Beryong, Sitang ug Sinto sa sityo Tabanog.(Kataposan)