Ang bana kong guwapo

Paghakot og tubig alang sa atong panghugasan, Dav," akong nadungog ni Nang Trining nga misugo kang David, ang iyang kamagulangang anak. "Ako lay hakot, Nang Trining," mitubag si Sofia, among silingan nga dalagang guwang.

"Ayaw, oy! Maikog ta nimo," tubag ni Nang Trining.

"Sige lang god, Nang," dayong kuha niini sa balde ug mipadulong sa banyo publiko diin didto kaming tanan magkuha og tubig sa wala pay mga koneksiyon sa tubo niadtong panahona.

"Ka wa gyu’y uwaw anang Sofia, no Emma, siya pay nangagad ngadto sa inahan ni David," matud ni Nilda.

"Guapo man god kaayo na si David, Nil, gawas pa, hadlok na mabiyaan sa biyahe kay kapin na ra ba na sa trienta."

"Di siya ma-uwaw nga nineteen pa man na si David kay maguwang lang nako og usa ka tuig. Ikaw, Emm, wa kay gusto ni David?"

"May gusto unta, pero di ko pauson ni David, Nil, kay bata pa ko, fifteen pa god ko," nangatarungan pa ko. Apan sukad niadto, kanunay na ako nga maghunahuna kang David. Hangtod ang akong apohan nga babaye nga maoy nagpadako nako, nakamatikod.

"Maayo tingali, Emma, "mobakasyon ka una didto sa Iligan, sa imong inahan."

"Unya ikaw rang usa dinhi, lola -- magmingaw ka lang?"

"Way sapayan nako, Day, kay tiguwang na man ko."

Milarga ako ngadto sa Iligan, sa akong inahan nga naminyo og lain sukad siya mabiyuda mga napulo na ka tuig ang miagi. Duha ako ka tuig sa Iligan ug wala gayud ako magtuo nga sa maong gidugayon, hiabtan ko pang ulitawo si David.

"Uy! Dav, komusta ka?"

"Kinsa ka man to? Uy! Si Emma man diay ni, kaguwapa na nimo, Em, wa man ko kaila dayon."

"Ari unya sa balay, Dav, kay magbalitaay ta."

"Karong gabii, Em, mamisita gyud ko nimo."

Tuod man, wala palabya ni David ang higayon, ug nianang gabhiona, "Em," mitutok si David nako, "magminyo na ko."

"Ha!" Labihan ang akong kakurat kay wa ko magdahom nga minyoonon na diay si Dav. Naluya ako pagkalit ug dugay kong wa ka tingog. "Kang kinsa man?" pinugos kong tubag.

Gikuptan ni Dav ang akong kamot, "Ikaw ang akong minyoan, Emma."

Sama sa gibayaw ako sa langit sa akong nadungog.

"Tinuod ka Dav, nga wa ka man gani mangulitawo nako?"

"Hain may gusto nimo, sa mangulitawo ko -- o sa magminyo ko nimo? Pahagka ko bi."

"Oo, Dav, sa tibuok kong kasingkasing," ug gigakos ko si Dav. (Kataposan)