Gula 92
Mora’g hingpit nga naibtan og tunok si Destiny. Mora ba’g may blessing in disguise nga nahitabo sa iyang kinabuhi. Kay gawas nga nasulbad na ang suliran nila ni Evan, nakalingkawas pa gayod siya sa nahitakda na untang pagbuya sa iyang amahan kaniya ngadto kang Greger. Wala gayod siya makagusto sa maong lalaki. Wala kang Greger ang mga hiyas sa usa ka lalaki nga iyang gipangita.
Ang tanang mga hiyas sa lalaki nga iyang nagustohan iyang nakaplagan diha kang Evan, ang lalaki nga iyang giila ug gituohan kaniadto nga igsuon niyang pursoso. Sukad pa kaniadto nakadayeg na siya sa kaambong ni Evan. Wala siya makatugkad sa hingpit kun nganong ingon na lang niini kadako ang iyang pag-admire sa kaambongan niini.
Walay sambog nga malisya ang iyang pagdayeg sa kaambongan ni Evan kaniadto. Gibati lang niya ang dakong garbo nga nakabaton siya og “igsuon” nga macho ug guwapo.
Karon nga nasayod na siya sa matuod nga dili diay sila managsuon si Evan, inanay nga nausab ang iyang pagtan-aw ug pagtagad ngadto niini. Namatikdan niya nga may talagsaong pagbati nga migitib sa iyang kasingkasing alang kang Evan. Mora ba’g may espesyal nga dapit si Evan sa iyang dughan. Mosamot na kun mahinumdom siya sa nahitabo nila ni Evan didto sa bus usa niana ka higayon. Mahimuot siya kun mahinumdom niadto. -- Sumpayan pa