Paukyab sa gugma

Wala makapauli dayon si Vanessa pagkahuman sa iyang trabaho sa banko isip teller kay giimbetar siya ni Thelma, suod niyang amiga nga nagtrabaho usab sa maong banko.

" Ayaw ko’g balibari, Van, aron di ko mahiubos nimo. Birthday nako karon."

"Uy, happy birthday diay, Thel."

Nangatawa sila og nagdungan sa paggawas sa gitrabahoang banko. Nanakay sila og taksi. Mipaingon sila sa uptown. Ug nanulod og restawran. Medyo ngitngit na, alas sayis imedya na sa bag-ong gabii. Nanihapon sila.

Unya, napahunong si Vanessa sa pagkaon. Misulod sa maong restawran si Alfred, dunay kuyog nga babaye. Malipayon kaayo sila nga nanglingkod sa usa ka lamesa. Nakaila siya sa babaye, si Anita, girlfriend kaniadto ni Alfred.

"Manggawas na ta, Thel. Nakahuman na man tag kaon."

"Kadali god."

"Basta manggawas na ta dinhi. Gusto na kong mopauli." Mapugsanon si Vanessa. Naglagot na gyod siya pag-ayo kang Alfred ug Anita. Malipayon kaayong nagsultihanay samtang naghulat sa giorder nga mga pagkaon.

Nakahilak si Vanessa pagsulod na niya sa iyang lawak pag-abot niya sa ilang balay sa Jakosalem. Wala siya magtuo nga makita niya ang dili niya angay nga makita. Nahiuli na diay si Anita gikan sa London. Nagtrabaho kini didto isip usa ka nars. Dugay na. Upat na ka tuig. Ug karon...

Pagkasunod gabii, namisita si Alfred kang Vanessa. Walay maayong buot ang dalaga nga miatubang sa ulitawo.

"Nganong nia ka, Alfred? Nganong wa ka man didto kang Anita?"

"Unsa god nang imong gipanulti, Van?" Nia ko kay trato ta. Ug si Anita, di na mahitabo nga masumpayan pa ang naputol namong gugma."

Usa ka engineer si Alfred. Hinigugma ni Vanessa. Nakaila si Vanessa kang Anita. Apan gisugot niya si Alfred kay gimahal niya kini. Gawas pa, wala na siya magtuo nga madugtongan pa ang gugma ni Alfred ug Anita kay dugay na man kini sa London.

"Nakita ko kamo si Anita sa restawran sa uptown sa miaging gabii."

"Tinuod nang imong gisulti apan di bahin sa among gugma ang among gi-estoryahan."

Mosulti pa unta si Vanessa apan nahiabot si Anita nga gipasulod sa inahan ni Vanessa. Migakos si Anita kang Vanessa. Malipayon si Anita.

"Mobalik na ko sa London next week, Van. Mipauli ko dinhi sa ato aron sa pagpahibawo kang Alfred nga magminyo na ko sa London. Gusto kong duna kami formal break-up."

Kalit nga misayag ang nawong ni Vanessa.                                                 

"I wish you all the luck, Van. Mahala si Alfred. Ug Alfred, mahala si Vanessa."

Taudtaod na nga nakalakaw si Anita. Karon nagsandig na si Vanessa sa dughan ni Alfred samtang naglingkod sila sa sopa. Wala nay kabalaka nga naghasol kaniya.

"I love you so much, Van."

"I love you too. Al."

Ug nag-akob ang ilang mga ngabil. (Kataposan)