Nalangan nga kabuntagon

Gula 87

“Unsa man kaha’y pakigsultihan nila ni Daddy ug Mommy nato?” Sukit ni Evan samtang naglingkod kini sa ngilit sa iyang kama.

“Ambot lang,” maoy tubag ni Destiny. “Nasayod na ra ba kuno sila sa atong tinagoan.”

“Mao sad kanay gisulti ni Daddy nako,” ni Evan. “Pero nahibulong lang ko kay wa man siya masuko.”

“Tingalig nagpugong lang sila aron dili ta maeskandalo didto sa ospital. Pero karon nga nia na ta sa ato, basin kaligoan na ta nila’g kasaba. Dako gud kaayo ang sala nga atong nahimo nila.”

“Di kaha ta nila palayason?”

“Posibleng mao kana’y mahitabo.”

“Kun pananglit palayason ta nila, unsa may imong buhaton?”

“Aw, mokuyog ko nimo. Di ko mosugot nga magkalagyo ta. Mokuyog ko nimo bahala’g asa pa kita mangabot.”

Wala motingog si Evan. Mitutok kini kaniya.

“Mag-unsa na man lang unya ko kun magkalagyo ta,” ni Destiny pa. “Kun palayason ta sa atong mga ginikanan, kinsa na man lang unya’y akong ikatambayayong sa pagbuhi sa atong anak?”

“Nakadawat na diay ka sa atong kahimtang?” Sukit ni Evan.

“Unsa pa may akong mahimo nga nia na man kini? Ikaw diay? Di ba diay ka andam nga mangamahan niining bata nga akong gisabak?” -- Sumpayan pa