Gidaman sa kahidlaw

Kuydawo nga mamukaw ka na usab kanako sa kaadlawon, nga maoy makadisturbo sa akong pagkatulog! Misinggaak sa tumang kalanog ang tingog ni Utyang. "Giingnan ko na baya ikaw Tonyo, nga sa gidaghanon sa atong mga anak nga hapit na moabot og usa ka dosena ... kinahanglan nga kitang duha magpuasa!"

Igo lang intawon nahitiurok sa gibarogan si Tonyo, nga nagpaminaw sa giyawit sa iyang asawa.

"Ngano pa man tuod Utyang, nga pugngan ta ang atong kagana? Kun unsay igasa sa kahitas-an nga makabaton kita og daghang anak ... ato kanang sakripisyohon og buhi!" ni Tonyo pa nga mitubag sa iyang asawa.

"Nagngalngal ka baya Tonyo? Maglugos ka man gani og buhi sa imong kaugalingon, pinaagi sa imong pagpananggot nga kanunay lang mokutod, ang pagpakaon na ba sa imong mga anak nga kanunay lang mapasahan sa gutom?" nagbakho nga namulong si Utyang.

Dili ikalimod ... nga sa miagi na karong duha ka bulan, kanunay na lang magtughong adlaw-adlaw ang magtiayon Tonyo-Utyang, diin seguroon na lang nila og pakaon ang ilang mga anak.

Gani, ning ilang balangay sa Kiwkiw, maisip man sila sa ilang mga silingan nga sobra pa ka kakha tuka ning ilang kahimtang.

Kaadlawon pa gani, timprano nga nanawat sa iyang sanggotan si Tonyo. Wa niya baliha ang katugnaw sa panahon.

Wa pa gani manugpa ang ilang mga manok nga namatog sa may dakong sanga sa kamansilis, didto na si Tonyo, sa ilang balay nga nagsangkiig og alsa sa mga sugong nga pulos napuno sa tuba.

Maoy iyang natukmaan nga nagpangyawyaw ang iyang asawa, nga nagpanawag sa iyang ngalan diin kini nagkanayon:

"Tonyooooo ..... asaaaa .... aaaaa ....... mannnnn ..... kaaaaaa?"

Sa sinugdan wa lang kadto panumbalinga ni Tonyo, si Utyang, nga sa tan-aw niya ingon sa gidaman.

"Naunsa ka Utyang? Unsay nahitabo kanimo nga nagpiyong pa man nang imong mata?' dihay kabalisa sa tuno sa pangutana ni Tonyo sa iyang asawa.

Giyugyog ni Tonyo ang abaga sa iyang asawa. Inanay kini nga gibuka ang mata, ug nagkanayon:

"Nagdamgo ako Tonyo ... nga gidigamo ako nimo og maayo ug maoy akong namat-an nga gidaman diay ako ... sa naghinubra kong kahidlaw nga way sama!"

Igo lamang mipahiyom si Tonyo ... ug mibanos ang nagbuy-od nga kamingaw gikan sa inudhak sa magtiayon. (Kataposan)