Nalangan nga kabuntagon

Gula 85

Pagpakaayo og dali, Hija,” nagkanayon si Mrs. Galasi. “Kun makagawas na kamo si Evan dinhi sa ospital, estoryahan nato’g maayo ang bahin kaninyong duha.”

Estoryahan? Nakasukot si Destiny sa iyang kaugalingon. Unsa pa bay angay panagsultihan bahin kanila ni Evan? Naklaro na ang tanan. Nabisto na ang ilang tinagoan. May angay pa ba diay’ng tukion mahitungod niini?

“Ayaw na gayod ninyo usba ang inyong tinguha sa pagpakamatay, ha,” pahimangno ni Mrs. Galasi. “Dili kini angay ninyong buhaton. Dili kinahanglan nga moabot sa ingon niining sitwasyon ang nahitabo kaninyo.”

Wala motingog si Destiny. Taphaw ra kaayo ang iyang pagsabot sa sinultihan sa iyang inahan.

“Kun makagawas na kamo dinhi sa ospital,” sa inahan pa,” mamauli kita didto sa ato. Daghan kita’g angay panagsabotan mahitungod kaninyo ni Evan. Sulbaron nato kini sa labing daling panahon. Dili man dako kining maong problema. Kamo ray nagpadako niini. Samot na kun natigayon pa gayod ang inyong pagpakamatay. Mahu’g lang sa way hinungdan ang inyong kamatayon.”

Naglibog siya sa gisulti ni Mrs. Galasi. Nganong nakaingon man kini nga dili dako ang problema nila ni Evan? Dili ba diay dako ang suliran sa iyang kahimtang nga nagsabak siya ug si Evan ang amahan sa maong bata? Nganong ingon sa ordinaryo man lang kini nga suliran alang sa iyang inahan? -- Sumpayan pa